Арассыыйа Чуумпу акыйаан флотугар үөрэҕи ыыта сылдьар

РФ бэрэсидьиэнэ Владимир Путин бэҕэһээ, муус устар 17 күнүгэр, Оборуона миниистирин Сергей Шойгуну кытары көрүстэ. Көрсүһүүгэ миниистир Чуумпу акыйаан флотун бэрэбиэркэлээһин туһунан иһитиннэрдэ.

Сергей Кужугетович бэлиэтииринэн, Чуумпу акыйаан флотугар үөрэҕи ыытыы муус устар 14 күнүттэн саҕаламмыт. Үөрэҕи барыта 25 тыһыынчаттан тахса байыаннай бара сылдьар. Байыаннайдар 167 бойобуой суудунаны, тиэхиньикэни, ол иһигэр уу аннынан сылдьар 12 суудунаны, 89 салгын тырааныспарын бэрэбиэркэлииллэр.

— Чуумпу акыйаан флотугар байыаннай бэрэбиэркэ бара турар. Флот ыйыллыбыт сыалын-соругун толорууга киирдэ. Бэрэбиэркэ иккис түһүмэҕэр Охотскай муора соҕуруу өттүгэр барыахтара, — диэн иһитиннэрэр Сергей Шойгу.

Владимир Путин этэринэн, билигин Арассыыйа сүрүн байыаннай күүһүн төһө да Украина кыраныыссатыгар уурбутун иһин, атын сирдэргэ флоту бэрэбиэркэлээһин, анал үөрэхтэри ыытыы хайаатар да барыахтаах.

— Ханнык баҕарар флот соһуччу бэрэбиэркэҕэ бэлэм буолуохтаах. Бу курдук байыаннай үөрэхтэр Арассыыйа флоттарыгар барыларыгар ыытыллыахтаахтар, — диэн бэлиэтиир Владимир Владимирович.