Арассыыйа дьахтара 41 сааһыгар 13-с оҕотун төрөөбүт

Раменскайдааҕы ийэ уонна оҕо киинин быраастара 41 саастаах ийэҕэ 13-с оҕотун төрүүргэ көмөлөспүттэр. Ол туһунан мэдиссиинэ тэрилтэтин пресс-сулууспатыгар иһитиннэрдилэр.

Оҕо төрөөһүнэ быраастар орооһуута суох ааста. Уол оҕо 3770 грамм ыйааһыннаах, 51 сантиметр уһуннаах.

«Ийэ оҕону бэйэтэ төрөөтө, барыта этэҥҥэ ааста. Бу ыалга урукку түөрт оҕо эмиэ маннааҕы оҕо төрүүр дьиэҕэ күн сирин көрбүттэрэ. Барыларын ийэлэрэ бэйэтэ төрөөбүтэ», — диэн акушер-гинеколог Ярослав Спиридонов кэпсиир.

Дьахтары уонна саҥа төрөөбүт оҕону балыыһаттан таһаардылар. Оҕону дьиэтигэр аҕата,  түөрт улахан убайдара уонна аҕыс эдьиийдэрэ көрүстүлэр. Бу иннинэ Москва таһыгар Красногорскайга олохтоох балыыһаҕа быраастар 36 саастаах дьахтар 10 оҕотун төрөппүттэрэ.Оттон Дагестаҥҥа быраастар 41 саастаах дьахтарга 10 оҕотун төрүүргэ көмөлөспүттэрэ.