Арассыыйа Дьоруойа Александр Колесов Дьокуускайга Бэргэн ытыы киинин салайыаҕа

Бэргэн ытыы киинин үлэтин Саха Өрөспүүбүлүкэтигэр оробуочай сырыытын кэмигэр РФ Бырабыыталыстыбатын Бэрэссэдээтэлин солбуйааччы – Уһук Илиҥҥэ РФ Бэрэсидьиэнин боломуочуйалаах бэрэстэбиитэлэ Юрий Трутнев билистэ.

Полигоҥҥа вице-премьер Саха Өрөспүүбүлүкэтин баһылыгын Айсен Николаевы кытта сырытта.

“Аҕа дойду Улуу сэриитин кэмигэр Саха сирэ чулуу снайпердарынан уонна ытааччыларынна аатырбыта, Саха сириттэн 25 киһи Сэбиэскэй Сойуус дьоруойа буолбута. 400 өстөөҕү сууһарбыт Федор Охлопков номоххо киирбитэ. Кини манна үөрэнээччилэргэ холобурунан буолуоҕа. Киин Уһук Илиҥҥэ бүттүүнүгэр уонна Арассыыйа атын эрэгийиэнигэр үлэлиэҕэ. Оттон бу киини Арассыыйа Федерациятын Дьоруойа Александр Колесов салайбыта олус сөптөөх. Кини кыайыыга туох ирдэнэрин чопчу билэр. Байыаннай дьайыы хайдах баран иһэрин бэйэтин  этинэн-хаанынан билбит киһи”, — диэтэ Юрий Трутнев.

Бэргэн ытыыга бэлэмниир киини тутуу 2022 сыл ахсынньыга Юрий Трутнев сорудаҕынан саҕаламмыта. Вице-премьер онно Арассыыйа Бэрэсидьиэнин байыаннай-спортивнай бэлэмнээһин уонна патриотическай иитии кииннэрин тэрийэр туһунан сорудаҕын санаппыта.  Бүгүн Дьокуускайга киин үөрэнээччилэри ыларга бэлэм буолла. Маныаха Юрий Трутнев эбийиэги үрдүк таһымнаах гына бэлэм оҥорор наадатын ыйда. “Биһиги киин салгыы сайдарын өйүөхпүт, полигоҥҥа үчүгэй тиэхиньикэ уонна бойобуой кэмпилиэктэр баар буолалларын, манна экстра-кылаастаах ытааччылар бэлэмнэнэллэрин туһугар сөптөөх ньымалаах дьарык баар буолуохтаах, оччоҕо кинилэр кыайыыны ситиһэн, байыаннай дьайыы ыытыллар эрэгийиэннэригэр биһиги байыастарбытын быыһыахтара”, — диэтэ Юрий Трутнев.

Эбийиэги арыйыыга байыаннай дьайыыга кыттар анал подразделениелар хамандыырдара – тактическай уонна бойобуой снайпиҥҥа сүрүн исписэлиистэр кытыннылар.

“Снайпер үлэтэ – биһиэхэ кыайарга көмөлөһөр идэлэртэн биирдэстэрэ. Бу олус суолталаах дьыала, онон Уһук Илиҥҥэ айаммын Саха сириттэн саҕалаатым”, — диэтэ Юрий Трутнев.

“Бэргэн ытыы киинин дойду салалтатын кытта сөбүлэһэн туттубут. Бу эбийиэк снайпердарынан аатырбыт өрөспүүбүлүкэбитигэр эрэ буолбакка, дойдуга бүттүүнүгэр наадалаах. Манна байыастары тактическай бэлэмнээһиҥэ уонна саа-сэп араас көрүҥнэрин баһылыырга бары усулуобуйа тэриллиэҕэ. Снайпердары бэлэмнииргэ үрдүк кылаастаах инструктордары кытыннарыахпыт.

Үөрэтэр-эрчийэр полигон иэнэ 400 гектрга тэҥнэһэр. Полигоҥҥа гражданскай уонна сулууспаҕа туттуллар кылгас уостаах саанан, уһун уостаах саанан сулууспалыыр, бултуур уонна спортивнай саанан, эриллиилээх уостаах уонна доруоп саанан 4 км диэри тэйиччи аһаҕас сиргэ, сабыылах тииргэ ытыахтара.

Үөрэтэр кииҥҥэ байыаннай дьыаланы кытта билсэр үөрэнээччилэри, байыаннай эпэрээссийэ бара турар сириттэн ыытыллыбыт байыаннай сулууспалаахтар бөлөхтөрүн таһымнарын уонна дьоҕурдарын үрдэтэргэ үлэлиэхтэрэ. Манна көннөрү дьон, силовой структуралар уонна идэтийбит тэрилтэлэр үлэһиттэрэ сааны-сэби кытта сэрэхтээхтик туттарга, чугастан уона ыраахтан ытыы дьоҕурдарыгар үөрэниэхтэрэ.

Санатан эттэххэ, дойду 12 эрэгийиэнигэр быйыл ыам ыйыгар “Воин” байыаннай-спортинай бэлэмнэнии уонна ыччаты патриоттуу иитии киинин эрэгийиэннээҕи филиаллара үлэлэрин саҕалаабыттара. Саха сиригэр билиҥҥитэ итинник киин суох, ол эрээри Дьокуускайга үөрэтэр-эрчийэр киин Арассыыйа Федерациятыгар тэриллэр байыаннай-патриоттуу бэлэмнээһин ситимигэр биирдэстэринэн буолуоҕа.

Саха Өрөспүүбүлүкэтин Ил Дарханын уонна Саха Өрөспүүбүлүкэтин Бырабыыталыстыбатын пресс-сулууспата