Арассыыйа Дьоруойа Александр Колесов: «Владимир Владимирович снайпердары бэлэмниир кииммитин салгыы өйүөх буолла»

Арассыыйа бэрэсидьиэнэ Владимир Путин Саха сиригэр кэлэн Үлэ кыбаарталыгар сырытта. Манна киниэхэ снайпердары бэлэмниир уонна үөрэтэр киин үлэтин-хамнаһын билиһиннэрдилэр. 

Киин салайааччыта Александр Колесов бэлиэтииринэн, снайпердары бэлэмниир киини Владимир Владимирович салгыы өйүүрүн туһунан иһитиннэрбит.

«Биһиги байыаннай дьайыыга үлэ туһунан  кэпсэттибит, онно снайпердары бэлэмниир кииммит байыаннай дьайыы буола турар сиригэр уонна манна, өрөспүүбүлүкэ төһө снайперы бэлэмнээбитин, төһө ыраахтан ыталларын эҥин туһунан кэпсэтистибит. Бэрэсидьиэн барытын иһиттэ уонна салгыы кииммитин өйүөх буолла», — диэн Александр Колесов санаатын үллэһиннэ.

Ону сэргэ, Александр Колесов судаарыстыбаннай наҕарааданы туппута балачча бириэмэ  ааспытын да кэннэ, Владимир Владимирович кинини олус истиҥник көрсүбүтүн бэлиэтээтэ:

«Владимир Владимирович биирдэ көрбүтүн өйдөөн хаалар эбит. Кини миигин тута биллэ, ону сэргэ «Ярый» диэн позывнойдаах снайперы эмиэ умнубатах. Илии тутуста, аҕалыы кууста, олус истиҥник кэпсэттибит», — диир Александр Колесов.