Арассыыйа Дьоруойа Алексей Неустроев Донецкай Народнай Өрөспүүбүлүкэ Дьоруойун кыһыл көмүс сулуһунан наҕараадаланна

Арассыыйа дьоруойа, “Алеша” биллиилээх тааҥка экипаһын чилиэнэ Алексей Неустроев дойду Бырабыыталыстыбатын бэрэссэдээтэлин солбуйааччы – Уһук Илиҥҥэ РФ бэрэсидьиэнин боломуочуйалаах бэрэстэбиитэлэ Юрий Трутнев илиититтэн ДНӨ Дьоруойун кыһыл көмүс сулуһун тутта. Үөрүүлээх наҕараадалааһын Аҕа дойдуну көмүскээччи күнүн иннинэ буолла.

Наҕараадалааһын туһунан докумуоҥҥа олоҕуран, үрдүк аат “Донецкай Норуодунай Өрөспүүбүлүкэ босхолонуутугар уонна сайдыытыгар, дьоруойдуу быһыыны оҥорууну кытта сибээстээх, судаарыстыба уонна норуот иннигэр үтүөлэрин иһин” иҥэриллибит.

Алексей Неустроев бу киниэхэ үрдүк чиэс буоларын этэр. “Аҕа Дойдуну көмүскээччи күнүнэн эҕэрдэлиибин, кытаанах доруобуйаны баҕарабын. Билигин байыаннай эпэрээссийэҕэ сылдьааччыларга түргэнник тыыннаах уонна доруобай дойдуларыгар кэлэллэригэр баҕарабын”, — диэн Неустроев эттэ.

Анна Лебединская, СИА.