Арассыыйа Дьоруойа Алексей Петрову дойдутугар — Үөһээ Бүлүүгэ көрүстүлэр

Арассыыйа Дьоруойа Алексей Петров төрөөбүт дойдутугар, Үөһээ Бүлүү улууһугар, кылгас уоппускатыгар кэллэ. Кини чугастааҕы күннэргэ төрөөбүт-үөскээбит нэһилиэгэр, Маҥааска тахсан сылгыларын көрөр былааннаах. Бу туһунан улуус баһылыга Валерий Николаев  ТГ-ханаалыгар иһитиннэрдэ.

Санатан эттэххэ, быйыл сайын Алексей Петровка улуус 21 нэһилиэгэ 21 убаһаны бэлэхтээбитэ. Дьоруой инникитин тыа хаһаайыстыбатын сайыннарыыга кылаатын киллэрэр, саха төрүт дьарыгынан – сылгы иитиитинэн дьарыктанар баҕалааҕын биллэрбитэ. Билигин кини Арктикатааҕы агротехнологическай университет «Зоотехния» идэтигэр үөрэнэр. Биир дойдулаахтарыгар көмөлөһөн, сылгылар кыстыыр отторун Үөһээ Бүлүү улууһун тыатын хаһаайыстыбатын управлениетын күүһүнэн Маҥааска тиэрдибиттэрэ.

Көрсүһүү кэмигэр Үөһээ Бүлүү улууһун байыаннай дьайыылар бэтэрээннэрин Ассоциациятын бэрэссэдээтэлин солбуйааччылара Владимир Поскачин уонна Семен Васильев байыаннай дьайыы кыттыылаахтарын сир учаастагынан хааччыйыы боппуруоһун көтөхтүлэр.

«Улуус баһылыга Валерий Николаев этэринэн, дьон дьиэ туттан олороругар табыгастаах, инфраструктуралаах сир учаастактарын элбэтэр сыалтан саҥа микрооройуоннары сайыннарыыга үлэ ыытыллар», — диэн баһылык иһитиннэрбитин суруйда. Ону таһынан, көрсүһүүгэ байыаннай дьайыы бэтэрээннэрин кытта бу ыйга былааннанан айанныахтаах гуманитарнай көмө боппуруоһун дьүүллэстилэр. Инники кирбиигэ сылдьар байыастарга туох ордук наадалааҕын уонна туһалаах буолуон сүбэлэстилэр.