Арассыыйа Дьоруойа Андрей Григорьев СӨ мас-рестлиҥҥэ федерациятын вице-бэрэсидьиэнинэн талылынна

«Тута» позывнойдаах Арассыыйа Дьоруойун Андрей Григорьевы СӨ мас-рестлиҥҥэ федерациятын бочуоттаах чилиэнинэн уонна вице-бэрэсидьиэнинэн таллылар. Дастабырыанньаны туттарыы мас-рестлиҥҥэ өрөспүүбүлүкэ чөмпүйэнээтин кэмигэр буолла диэн ЯСИА иһитиннэрэр.

Дьокуускайга «Модун» успуорт уораҕайыгар олунньу 14 күнүгэр Гаврил Десяткин кэриэһигэр мас-рестлиҥҥэ Саха сирин чөмпүйэнээтэ саҕаланна. Күрэхтэһии бастакы күнүгэр помостка 190 кэриҥэ спортсмен кииристэ. Бу күрэхтэһии Арассыыйа чөмпүйэнээтигэр кыттар өрөспүүбүлүкэ сүүмэрдэммит хамаандатын састаабын быһаарарга сүүмэрдиир суолталаах.

Өрөспүүбүлүкэ чөмпүйэнээтин үөрүүлээх арыллыытыгар уопсастыбаннай тэрилтэ салайааччыта, аан дойду чөмпүйүөнэ Анатолий Баишев Арассыыйа Дьоруойугар Андрей Григорьевка мас-рестлинг федерациятын бочуоттаах чилиэнин уонна вице-бэрэсидьиэнин дастабырыанньатын туттарда.

Бырабыыталыстыба бэрэссэдээтэлин солбуйааччы Сергей Местников Саха сирин национальнай успуорт көрүҥнэрэ хас биирдии муниципальнай тэриллиигэ күүскэ сайдалларын, эдэр ыччаты тардалларын бэлиэтээтэ. Мас-рестлиҥинэн билигин өрөспүүбүлүкэҕэ эрэ буолбакка, атын дойдуларга эмиэ дьарыктаналлар.

«Билигин мас-рестлиҥҥэ аан дойду чөмпүйэнээттэрэ ыытыллаллар, ону тэҥэ биһиги успуорпут көрүҥнэрэ Көһө сылдьар омуктар аан дойдутааҕы оонньууларын бырагырааматыгар киирэллэр. Оттон бүгүҥҥү күрэхтэһиигэ 26 хамаандаттан 360 кэриҥэ күрэсчит кыттар. Бу үрдүк көрдөрүү», — диэн Сергей Местников эттэ.

Кини 2025 сыллааҕы мас-рестлиҥҥэ Европа чөмпүйэнээтин ыытыыга кылаатын иһин Словакия туризмҥа уонна Успуорка министиэристибэтин өйдөбүнньүк мэтээлин Саха сирин физическэй култуураҕа уонна успуорка миниистиригэр Леонид Спиридоновка туттарда. Вице-премьер эмиэ аан дойду чөмпүйүөннэригэр Анатолий Гладковка уонна Дмитрий Поповка национальнай успуорт көрүҥнэригэр бочуоттаах маастардар бэлиэлэрин уонна дастабырыанньаларын туттарда.

Леонид Спиридонов бэйэтин тылыгар Саха сирэ мас-рестлиҥҥэ Арассыыйа чөмпүйэнээтин аан бастаан ылыаҕын бэлиэтээтэ. Күрэхтэһии муус устарга Нерюнгрига буолуоҕа. Онно Казаньҥа буолар аан дойду чөмпүйэнээтигэр дойду хамаандатын састааба быһаарыллыаҕа.

Миниистир Владимир Мохначевскайга, Тимур Корякиҥҥа уонна Анна Саморцеваҕа мас-рестлиҥҥэ Саха сирин успуордун маастарын дастабырыанньаларын уонна бэлиэлэрин туттарда. Бүтүн Арассыыйатааҕы мас-рестлинг федерациятын бэрэсидьиэнэ Михаил Гуляев илиититтэн аан дойду чөмпүйүөнэ Станислав Иванов норуоттар икки ардыларынааҕы кылаастаах Арассыыйа успуордун маастарын бэлиэтин уонна дастабырыанньатын тутта.