Арассыыйа Дьоруойа Артур Орлов ыччаттары кытта көрүстэ

Арассыыйа Дьоруойа, Бүтүн Арассыыйатааҕы оҕо уонна ыччат «Движение первых» уопсастыбаннай-судаарыстыбаннай хамсааһын бырабылыанньатын бэрэссэдээтэлэ Артур Орлов уонна СӨ бырабыыталыстыбатын бэрэссэдээтэлин солбуйааччы Ольга Балабкина тохсунньу 20 күнүгэр саҥа «Патриот» ыччат киинигэр эрэгийиэннээҕи «Движение первых» хамсааһыҥҥа Арыйыы сылын арыйдылар.

Артур Орлов саҥа ыччат киинин аныгы хааччыллыытын уонна эйгэтин хайҕаата, оскуола оҕолоро, ыччаттар «Патриот» бырагыраамаларыгар, тэрээһиннэригэр интэриэстэрэ үрдүгүн бэлиэтээтэ уонна бу бэртээхэй саҥа дьиэ баар буолбутун хайҕаата.

Бырабыыталыстыба бэрэссэдээтэлин солбуйааччы Ольга Балабкина региональнай «Движение первых» бастакы настаабынньыга Айсен Николаев буоларын санатта.

«Бүгүн биһиги төһө кыалларынан элбэх ыччаты түмэн, Саха сиригэр да, бүтүн Арассыыйаҕа да ураты буолуон сөптөөх саҥа бырайыактары саҕалыыбыт. Биһиги сыалбыт-сорукпут – хамсааһын кэккэтин кэҥэтии, тоҕо диэтэххэ, чуолаан «Бастакылар хамсааһыннарыгар» ыччат кыаҕын уонна көхтөөх буолуутун көрүөххэ сөп», — диэн Ольга Балабкина бэлиэтээтэ.

Салгыы Дьокуускай куорат олохтоох салаатын Бастакылар Сэбиэттэрин үлэтин-хамнаһын билистилэр, 31 №-дээх оскуолаттан «Вызов первых» бырайыак финалистара биэрбит спортивнай маастар-кылаастарыгар сырыттылар, Нам улууһун салаатын чилиэннэрэ национальнай оонньуулары көрдүлэр.

10 №-дээх оскуолаттан  Д.Г. Новопашин аатынан  Юнармия этэрээтин оҕолоро пулеметтары хомуйар уонна ыһар дьоҕурдарын көрдөрдүлэр. 33 №-дээх оскуола үөрэнээччилэрэ «Хранители истории» слекка  кыттыбыт  уопуттарын үллэһиннилэр.

Аан дойдутааҕы үөрэхтээһин киинин хамаандата бастакы көмөҕө маастар-кылаас көрдөрдө. Киин выпускнига, билигин М.К. Аммосов аатынан Хотугулуу-Илиҥҥи федеральнай үнүбэрсиэккэ бастакы кууруска үөрэнэр Никита Попов «Бастакылар хамсааһыннарыгар» үөрэммит бастакы көмө үөрүйэхтэрин туһанан, бааһырбыт киһи олоҕун хайдах быыһаабытын мустубут дьоҥҥо кэпсээтэ. Бу түбэлтэ оскуола оҕолоругар мэдиссиинэ уонна патриотическай иитии төрүттэрин үөрэтии суолтатын дьэҥкэтик туоһулуур.

Артур Орлов 2026 сылга «Зарница 2.0» Бүтүн Арассыыйатааҕы байыаннай-патриотическай оонньууга бэлэмнэниигэ анаммыт төгүрүк остуолга кытынна уонна оҕолорго Арассыыйа пааспардарын туттарда.

Сиһилии: https://www.sakha.gov.ru/news/18785