Арассыыйа Дьоруойа Бурхаакка анаммыт кылаас чааһа буолла

Бэҕэһээ, балаҕан ыйын 2  күнүгэр, Таатта улууһун Туора Күөл орто оскуолатыгар Арассыыйа Дьоруойа Родимир Максимовка анаммыт кылаас чаастара ыытылыннылар.

Ол курдук, Родимир төрөөбүт нэһилиэгин оскуолатын үөрэнээччилэригэр 1-11  кылааска диэри оскуола үрдүнэн кылаас чаастара буоллулар. Бу туһунан Арассыыйа  Дьоруйун ийэтэ Варвара Николаевна  санаатын үллэһиннэ:

— Бэҕэһээ, оскуолаҕа билии күнүн көрсө уопсай линейкаҕа тиийэн оҕолорбун Дариналаах Вадиммын кытта тахсан тыл эппиппит. Уолум Вадим убайыгар Родимирга анаабыт хоһоонун аахпыта. Даринам ахсыс кылаас буолла, Вадим төрдүс кылааска таҕыста. Убайдарынан наһаа киэн тутталлар, ахталлар. Родимир үөрэх дьыла саҕаламмытынан Джур Захаров диэн бэһис кылааска үөрэнэр уолчааҥҥа тус бэлэҕин ыыппыта. Джур аҕата Василий Семенович Захаров уонна мин кэргэним, оҕолорум аҕалара Дмитрий Иванович оскуолаҕа бииргэ үөрэммиттэрэ, доҕордуу этилэрэ. 2022  сыллаахха биһиги аҕабыт олохтон барбытыгар Василий аҕабыт көмүс уҥуоҕун туппута. Эһиилигэр Василийбыт бэйэтэ ыалдьан олохтон барбыта, кыра оҕолоро соҕотох ийэҕэ хаалбыттара. Ол иһин Родимир махтанан, истиҥник санаан, аҕатын доҕорун оҕотугар бэлэх ыыппыта эмиэ дириҥ суолталаах. Оҕобор, Родикпар, биир дойдулаахтара Федор Павлов, Евдокия Аммосова- Дьэбдьэкиэйэ хоһооннорун анаабыттара. Биир дойдулаахтарбар, дьоммор-сэргэбэр махтанабын.