Арассыыйа Дьоруойа Дмитрий Куценко Өлүөхүмэҕэ тиийдэ

Бүгүн Арассыыйа Дьоруойа Дмитрий Куценко төрөөбүт, улааппыт улууһугар Өлүөхүмэҕэ тиийдэ. Дьоруойу оҕолуун улаханныын бары аэропорка көрүстүлэр.

“Бүгүн биһиги улууспутугар – ураты күн. Киэн туттан, долгуйан туран Арассыыйа Дьоруойун, гвардаия полковнигын – хорсун быһыыта бүтүн бары Өлүөхүмэ улууһун күүстээх санаа бэлиэтинэн буолбут Дмитрий Куценконы аэропорка көрүстүм! Үлэ кэлэктииптэрин, ыччаты, бэтэрээннэри уонна уопсастыбаннаһы кытта Дьоруойбутун эҕэрдэлии тоһуйдубут. Кини  олоҕо – Аҕа дойдуга сулууспалааһын үтүө холобурун көрдөрөр.

Улуус бары олохтоохторун ааттарыттан Дмитрийга махтанабын. Былырыын балаҕан ыйыгар кини дойду үрдүк наҕараадатын – Арассыыйа Дьоруойун “Кыһыл көмүс сулуһун” туппута. Бу кини тус эрэ кыайыыта буолбатах, хас биирдиибитигэр улахан чиэс. Анал байыаннай дьайыыга Мариуполы босхолооһуну, сүрүн суолталаах кыраныыссаны дьоруойдуу көмүскээһиҥҥэ кини хорсун быһыыта устуоруйаҕа суруллан хаалла!” – диэн Өлүөхүмэ улууһун баһылыга Николай Харбин тус телеграм ханаалыгар санаатын үллэстэр.

Дмитрий Өлүөхүмэ улууһун 2-с нүөмэрдээх оскуолатыгар үөрэммитин, учууталларын Любовь Миронованы, Юрий Васильевы кытта похуокка сылдьан Ийэ дойдуга тапталы иҥэриммитин бэлиэтиир.

“Кини дьиэ кэргэнэ – көлүөнэлэр утумнааһыннарын үтүө холобура. Фронтовик хос-хос эһэлэрэ, кинини сулууспатыгар өйүүр убайдара, кэргэнэ, кыргыттара – бары кини халбаҥнаабат кытаанах бигэ тирэхтэрэ.

Бүгүн көрсүһүүгэ кэлбиттэр! Эһиги ытыскыт тыаһа – Дьоруойга бастыҥ наҕараада.

Дьоруой буолан төрөөбөттөр, Дьоруой буолаллар. Дмитрий Куценко биһиги сэлиэнньэлэрбит уолаттара улуу дьыаланы оҥорор кыахтаахтарын дакаастаата. Кини устуоруйата – Ийэ дойдуга таптал кыраттан салаҕаланарын санатар: аҕа көлүөнэҕэ көмөлөһүүттэн, чиэһинэй дьүккүөрдээх үлэттэн, эппит тылга турууттан.  Кини холобура ыччат санаатын көтөҕүө, кыайыыга көҕүлүө!” – диэн этэр.

Итиэннэ түгэнинэн туһанан олохтоохторго туһаайан: “Төрөөбүт дойдугут устуоруйатын харыстааҥ, Дьоруойдарынан киэн туттуҥ, оҕолоргутун төрүттэрин хорсун быһыыларын ытыктыылларын курдук иитиҥ. Бииргэ тутуспутунан үүнэр көлүөнэҕэ үтүө өйдөбүлү тутан хаалыахпыт! Дмитрий, дойдугар, дьиэҕэр кэлбиккэр махтал. Бүтүн улуус – эйигин киэн туттар!” – диэн этэр.

Арассыыйаа Дьоруойа Дмитрий Куценконы бүгүн үөрэммит оскуолатыгар — Өлүөхүмэ куорат 2–с нүөмэрдээх оскуолатыгар көрүстүлэр, ардаҕы аахсыбакка Дьоруйдар аллеяларыгар миитин буолла.