Арассыыйа Дьоруойа Дмитрий Куценко Токко олохтоохторун кытары көрүстэ

Бэҕэһээ «Время героев» бырагыраама кыттыылааҕа Арассыыйа Дьоруойа Дмитрий Куценко Өлүөхүмэ улууһун ыраах сытар Токко нэһилиэгэр ыалдьыттаата. 

Дьоруой бу сырыытын кэмигэр олохтоох оскуолаҕа баар Дьаарханнааҕы түмэлгэ сырытта. Өлүөхүмэ улууһа урут-уруккуттан өҥ буордаах сирдэринэн, баай историялааҕынан, үгэстэринэн уонна сиртэн хостонор баайынан биллэр. Токко нэһилиэгэ ордук «Поиск» оскуола куруһуогунан киэн туттар, манна төрөөбүт дойдуну чинчийэр экспедициялары тэрийэллэр.

Бу экспедициялар тустарынан археологиянан, кыраайы үөрэтиинэн дьарыктанар дьон бары билэллэр. Ити барыта 1973 сыллаахха история учуутала Григорий Константинович Макаров үөрэнээччилэргэ анаан Токко тула бастакы походу тэрийбититтэн саҕаламмыта. 80-с сыллартан настаабынньыгын бу үтүө дьыалатын Петр Дмитриевич Габышев салҕаабыта, кини историяны үөрэтэр уонна сайын аайы оҕолору кытта похоттарга сылдьар. Похоттарга сылдьан булбут маллара-саллара үксэ тыһыынчаттан тахса экспонаттаах оскуола түмэлигэр хараллан сытар.

Дмитрий Михайлович Куценко Токкоҕо сырыытын түмүгүнэн нэһилиэк олохтоохторун кытта көрүстэ, кэпсэттэ, ыйытыыларыгар хоруйдаата.