Арассыыйа Дьоруойа эдэр ыччаттарга лиэксийэ аахта

Лектор үөрэнээччилэргэ, устудьуоннарга Хотугу полюска мүччүргэннээх  айанын устуоруйатын туһунан кэпсээтэ. Кини 1995 сыллаахха Канада чинчийээччитэ  Ричард  Веберы кытта тыҥааһыннаах усулуобуйаҕа Канадаттан Хотугу полюска диэри 2 тыһ. км айаннаабыттара.

«Бүгүн дьэ ураты көрсүһүү буолла. Биһиги иннибитигэр 30 сыл анараа өттүгэр Арассыыйа Дьоруойун үрдүк аатын ылбыт киһини кытта көрүстүбүт.  Михаил Георгиевич бириэмэ булан, биһиги эдэр ыччаттарбытын кытары көрсүбүтүнэн олус үөрдүм», — диэн  «Билии» Арассыыйатааҕы уопсастыба филиалын дириэктэрэ Дмитрий Апросимов эттэ.

Михаил Малахов олус чаҕылхайдык, умсугуйан туран Аляскаҕа, Алеутскай арыыларга, Саха сиригэр ураты тыыннаах айаннарын туһунан кэпсээтэ.

Көрсүһүүнү Нуучча географическай уопсастыбатын өйөбүлүнэн  «Знание» Бүтүн Арассыыйатааҕы уопсастыба Саха сиринээҕи салаата тэрийдэ.