Арассыыйа Дьоруойа Николай Соболев Ил Дархан көмөлөһөөччүтүнэн ананна

2025 сыллаахха ахсынньы 25 күнүгэр РФ Бэрэсидьиэнэ Владимир Владимирович Путин Судаарыстыбаннай Сэбиэт мунньаҕар дойду экэниэмикэтигэр каадырдары бэлэмниир боппуруоһу болҕомтотугар ылан, дойдуну сайыннарар тирэҕинэн ааттаабыта. Бэрэсидьиэн хас биирдии эрэгийиэҥҥэ дойду экэниэмикэтигэр каадырдары бэлэмнээн координациялыырга көмөлөһөөччүлэри аныырга соруйбутун туһунан Ил Дархан Айсен Николаев телеграм-ханаалыгар суруйар.

«Саха сириттэн бу дуоһунаска Арассыыйа Дьоруойа, «Эр санаа» икки уордьанын, «Хорсунун иһин» мэтээл кавелера, «Дьоруойдар кэмнэрэ» бырагыраама кыттыылааҕа Николай Сергеевич Соболев ананыаҕа. Байыаннай дьайыы кыттыылаахтарын уопуттара, дойдуга тапталлара, сулууспалыырга бэлэмнэрэ судаарыстыбаннай сулууспаҕа олус наадалаахтар диэн саныыбын. Ол иһин Николай Сергеевичкэ көмөлөһөөччүм буоларыгар этиибин киллэрдим.

Кини сүрүн соругунан — федеральнай былаас уорганнарын кытта бииргэ үлэлээн, экэниэмикэҕэ каадырдары бэлэмнээһини салайыы», —диэн Айсен Николаев суруйар.