Арассыыйа Дьоруойа Николай Соболев үөрэх министиэристибэтин үлэтин кытта билистэ

Арассыыйа Дьоруойа Николай Соболев «Дьоруойдар кэмнэрэ» федеральнай бырагыраама чэрчитинэн үөрэх министиэристибэтигэр стажировкатын ааста. Быраактыка кэмигэр кини үөрэхтээһин атын тэрилтэлэрин үлэлэрин эмиэ сэргээтэ уонна уопсай үөрэхтээһин хаачыстыбатын боппуруостарыгар ыытыллыбыт мунньахха кытынна. Бу туһунан министиэристибэ пресс-сулууспата иһитиннэрдэ.

Николай Соболев Саха сирин Аччыгый академиятыгар, идэни үрдэтиини бэлэмниир кииҥҥэ, үөрэхтээһин идэтин сайыннарыы институтугар сырытта. Маны таһынан Арассыыйа Дьоруойа Саха сирин наукатын академиятын салалтатын кытта көрүстэ.

“Бары тэрилтэлэргэ үлэһиттэр оҕолору, ыччаты сайыннарыы, үөрэтии, идэҕэ бэлэмнээһин улахан суолталаах уонна олус эппиэтинэстээх боппуруостарынан дьарыктаналлар, улахан быһаарыыны эрэйэр боппуруостар кэмигэр быһаарыллан иһэллэр, билиҥҥи кэм ирдэбилигэр эппиэттиир хамсааһыннар олоххо киирэллэр эбит”, — диэн санаатын үллэһиннэ Арассыыйа Дьоруойа.

Николай Соболев ыраах тэйиччи сытар оскуолаларга выпускниктары үлэҕэ ылыы, профориентация уонна каадыр тиийбэтин боппуруостарын бэлиэтээтэ.

“Бу боппуруоһу быһаарар туһугар араас хайысхалаах үлэ ыытыллар. Ол иһигэр “Сетевой учуутал” бырайыак. Өрөспүүбүлүкэ наукаларын академиятыгар бэйэм идэлээх дьарыкпын научнай үлэни кытта ситимниир былааннаах буолан, аспирантура туһунан билэргэ интэриэстээх этим”, — диэн бэлиэтээтэ.