Арассыыйа Дьоруойа Николай Соболев Үлэ министиэристибэтигэр стажировкаланар

Арассыыйа Дьоруойа, «Хорсун быһыы иһин» мэтээл кавалера, мотострелковай батальон хамандыыра Николай Соболев СӨ Үлэҕэ уонна социальнай сайдыыга министиэристибэтигэр стажировкаланар.

Стажировка РФ Бэрэсидьиэнэ В.В. Путин сорудаҕынан олоххо киирбит байыаннай дьайыы кыттыылаахтарыгар аналлаах «Дьоруойдар кэмнэрэ» үөрэтэр бырагыраама чэрчитинэн тэрилиннэ.

Атырдьах ыйын 18 күнүгэр Николай Соболев эрэгийиэн сүрүн социальнай тэрилтэлэрин үлэлэрин кытта билистэ. Стажировка күнэ Үлэ министиэристибэтин салалтатын кытта көрсүһүүттэн саҕаланна, онно стажировка былаана уонна министиэристибэ үлэтин урутаан иһэр хайысхалара билиһиннэрилиннилэр.

«Биһиги «Дьоруойдар кэмнэрэ» бырагыраама кыттыылаахтарын стажировкаҕа ыларбытыттан үөрэбит. Бу кинилэргэ биһиги тэрилтэлэрбит, ол иһигэр  байыаннай дьайыы кыттыылаахтарыгар уонна кинилэр дьиэ кэргэттэригэр көмөлөһөр чөлүгэр түһэрэр кииннэр үлэлэрин иһиттэн билсэргэ ураты кыах буолар. Үлэ бүтүн хаамыытын көрөллөрө, социальнай эйгэ үлэтин тупсарыыга этиилэрин киллэрэллэрэ улахан суолталаах», — диэн Үлэҕэ уонна социальнай сайдыыга миниистирин бастакы солбуйааччы Альбина Трубина бэлиэтээтэ.

Бырагырааммаҕа бастакынан Ю.П. Степанов аатынан Инбэлиитэри комплекснайдык чөлүгэр түһэрэр өрөспүүбүлүкэтээҕи социальнай-чэбдигирдэр киин буолла, онно билигин байыаннай дьайыы кыттыылаахтара доруобуйаларын чөлүгэр түһэрэллэр. Николай Соболевка эчэйии кэнниттэн чөлүгэр түһэрии аныгы технологияларын уонна методикаларын билиһиннэрдилэр. Ол кэннэ кини олоххо толору төннөргө наадалаах протезтары уонна ортезтары оҥорууну тэрийбит «Ортомед+» чааһынай хампаанньаҕа сырытта. Бу тэрилтэ байыаннай дьайыы кыттыылаахтарын протез-ортопедия оҥоһуктарынан хааччыйыыга улахан суолталаах.

Николай Соболев ону таһынан доруобуйаларынан хааччахтаах оҕолорго, ол иһигэр байыаннай дьайыы кыттыылаахтарын оҕолоругар, аналлаах Өрөспүүбүлүкэтээҕи чөлүгэр түһэрэр киин үлэтин кытта билистэ уонна бэтэрээннэргэ уонна кинилэр дьиэ кэргэттэригэр мэдиссиинэ уонна социальнай реабилитацияны, психологическай өйөбүлү, саҥаттан үөрэтиини уонна үлэнэн хааччыйыыны киллэрэн туран, комплекснай көмөнү оҥорор «Аҕа дойдуну көмүскээччилэр» судаарыстыбаннай пуондаҕа сырытта.

«Көмөҕө наадыйааччыларга туһуламмыт суолталаах тэрилтэлэргэ сырыттым. Үлэҕэ министиэристибэтигэр стажировка миэхэ олус сыаналаах уопут. Ылбыт билиим-көрүүм инники үлэбэр көмөлөһүө диэн эрэнэбин», — диэн Николай Соболев  бэлиэтээтэ.

 «Дьоруойдар кэмнэрэ» бырагыраама чэрчитинэн ыытыллар стажировкалар кыттааччыларга былаас уорганнарын үлэтин иһиттэн өйдүүргэ, үүнэллэригэр, судаарыстыбаннай уонна муниципальнай салайыы эйгэтигэр билиилэрин-көрүүлэрин уонна сатабылларын сайыннарарга туһуланаллар.