Арассыыйа Дьоруойа Петр Киприянов «Кыһыл Сулус» уордьанын аймахтарыгар туттардылар

Дьокуускайга Арассыыйа Дьоруойа Петр Киприянов «Кыһыл Сулус» уордьанын  аймахтарыгар туттардылар.

Ил Дархан Айсен Николаев эппитинэн, Петр Киприянов Саха сирин уонна Арассыыйа дьиҥнээх уола, хорсун санаалаах уонна эпиэтинэстээх, бииргэ сулууспалыыр байыастарга убаастанар этэ.

«Саха сирин хорсун уола, Хаҥалас улууһун олохтооҕо, мотострелковай взвод командира, младшай лейтенант Петр Киприянов төрөөбүт дойдутун туһугар олоҕун толук уурбута. Кыайыы туһугар тиһэх мүнүүтэтигэр диэри киирсибитэ», — диэтэ Айсен Николаев.

«Бүгүн генерал-майор Евгений Леонтенкову кытта Аҕа дойдуну көмүскүүргэ олоҕу олоҕун толук уурбут Арассыыйа Дьоруойа Петр Киприянов аймахтарыгар «Көмүс Сулус» уордьаны туттардыбыт.
Дьиҥнээх патриот, эрэллээх уонна хорсун командир — кини Дьоруойбут этэ. Петр өстөөҕү кытта аан бастакынан утарыласпыта, атыттары батыһыннарбыта, уустук балаһыанньаттан байыастары таһаарбыта. Бииргэ сулууспалааччылара киниэхэ мэлдьи эрэнэллэрэ.

Петр таптааллах ыал оҕото, кэргэн, ыал аҕата этэ. Саха сирин бүтүннүүтэ төрөппүттэрин кытта сүтүктэрин тэҥҥэ үллэстэр. Биһиги  Арассыыйа Дьоруойун туһунан уонна Кыайыы туһугар олохторун толук уурбут бары дьоруойдарбытынан өрүү саныы, ытыктыы сылдьыахпыт. Бары хорсун буойуннарбытыгар Уруй-Айхал!  Арассыыйа Дьоруойа Петр Киприяновка үйэлэргэ Албан аат!», — диэтэ Айсен Николаев.

Илин байыаннай уокурук материальнай- тэхиниичэскэй хааччыйыытын ыстаабын начаалынньыга Евгений Леонтенков иһитиннэрбитинэн, 2024 сыл балаҕан ыйыгар Петр Киприянов бэйэтин састаабынан утарылаһааччыны хас да төгүл штурмалаабыт. «Хас биирдии штурмаҕа куттаммакка утарылаһара. Утарсааччы позициятын тутан ылан, атын штурмовай бөлөхтөр сыҕарыйалларыгар кыах биэрэрэ»,-диэн генерал-майор аймахтарыгар махталын биллэрдэ.

Петр Александрович Киприянов — «Монгол» 1985 сыллаахха Покровскайга төрөөбүтэ. Мохсоҕолооҕу орто оскуола 9 с кылааһы бүтэрэн кэллиэскэ автомеханик идэтин баһылаабыт. Кэргэнэ Зинаида Васильевнаны кытта биэс оҕону ииппит. «РИК Автодор» ААУо-ҕа үлэлээбит. Кини анал байыаннай дьайыы кэмигэр дойду үрдүкү наҕараадатыгар тиксибит 11-с Саха сирин олохтооҕунан буолар. Бу иннинэ Арассыыйа Дьоруойа аакка РРодимир Максимов, Игорь Юргин, Николай Соболев, Александр Колесов, Филипп Евсеев, Алексей Неустроев, Дмитрий Егоров, Дмитрий Куценко, Николай Евдокимов, Андрей Григорьев  тиксибиттэрэ.