Арассыыйа Дьоруойун аҕата Александр Киприянов «Саллаат аҕата» мэтээлинэн наҕараадаланна

Хаҥалас улууһун баһылыга Сергей Гребнев иһитиннэрбитинэн, Арассыыйа Дьоруойа Петр Киприянов аҕата Александр Петрович Киприянов «Саллаат аҕата» үтүө мэтээлинэн наҕараадаланна.

Наҕарааданы киниэхэ Дьокуускайга, байыаннай дьайыы кыттыылаахтарын өйүүр «Кыайыы кынаттаах» аһымал кэнсиэр кэмигэр туттардылар.

Александр Петрович – 2024 сыл балаҕан ыйын 28 күнүгэр хорсуннук охтубут, «Монгол» диэн позывнойдаах Арассыыйа Дьоруойа Петр Киприянов аҕата. Кини байыаннай дьайыы кэмигэр бу үрдүк аакка тиксибит Хаҥалас улууһуттан төрүттээх бастакы Арассыыйа Дьоруойунан буолар.

«Александр Петровиһы үлэлиир хоспор тус бэйэм эҕэрдэлээтим. Аҕа дойду дьиҥнээх көмүскээччитин иитэн таһаарбытын, уолугар хорсун быһыыны уонна күүстээх санааны иҥэрбитин иһин дириҥ махталбын тиэртим. Биһиги маннык биир дойдулаахтарбытынан киэн туттабыт! Биһиги дьоруойдарбыт хорсун быһыыларын туһунан өйдөбүл Хаҥалас улууһун олохтоохторун сүрэҕэр үйэлэргэ хаалыаҕа», – диэн улуус баһылыга үөрүүлээх сонунун кытта үллэһиннэ.