Арассыыйа Дьоруойун Андрей Григорьев-Тутаны дойдутугар чиэстээтилэр

Арассыыйа Дьоруойун Андрей Григорьевы-Тутаны бүгүн төрөөбүт дойдутугар чиэстээн-бочуоттаан көрүстүлэр.

Ил Дархан Андрей Григорьевы эҕэрдэлииригэр, киниэхэ  Дьоруой уордьанын РФ Бэрэсидьиэнэ Владимир Путин Аҕа дойдуну көмүскээччи күнүгэр мээнэҕэ туттарбатаҕа диэтэ.

“Владимир Владимирович наҕараада туттарыан иннинэ миэхэ эрийэн, Андрей Григорьев хорсун быһыытыттан сөхпүтүн, тыын тыыҥҥа харбас түгэҥҥэ булгуруйбат модун санаалааҕын күүскэ сыаналаабытын, маннык байыастардаах буоламмыт биһиги куруук кыайыылаах тахсыахпыт диэбитэ”, — диэн Ил Дархан дойду аҕа баһылыгын сыанабылын бар дьонугар тиэртэ.

“Маннык дьоннор төрөөбүт Сахаларын сирин, дойдуларын аан дойду үрдүнэн аатырдаллар. Инники кирбиигэ сылдьар биһиги уолаттарбыт Аҕа дойду Улуу сэриитигэр хорсуннук кыргыспыт аҕа көлүөнэ хорсун быһыытын хатылыыллар. Бары түргэнник дойдуларыгар кыайыы көтөллөөх төннөн кэлэллэригэр баҕарабыт”, — диэн туран дьоруой ийэтигэр, кэргэнигэр, оҕолоругар барҕа махталын тиэртэ.

Андрей Григорьевы Аҕа дойдутугар бэриниилээх хорсун быһыытынан эҕэрдэлээн туран, Ил Дархан 1,5 мөл.солк. сэртипикээти туттарда.

Андрей Николаевич дойду Бэрэсидьиэнин кытта көрсүбүт долгутуулаах түгэннэрин кэпсээтэ. Ил Дархаҥҥа, өрөспүүбүлүкэ олохтоохторугар ахсаабат көмөлөрүн иһин махтанан туран, Айсен Николаевка бэйэтин бэлэҕин туттарда.