Арассыыйа Дьоруойун туһунан киинэни Саха сирин кинематографистара устуохтара

«Якутия, вперед!» биэриигэ Ил Дархан Айсен Николаев Арассыыйа Дьоруойа Андрей Григорьев — Тута туһунан киинэни манна Саха сирин кинематографистара устуохтара диэн эттэ.

Итинник баҕа санаалааҕын Дьоруой бэйэтэ эмиэ биллэрбит. Ил Дархан Айсен Николаев  киинэни устар туһунан өссө Петербурга норуоттар икки ардыларынааҕы экэнэмиичэскэй пуорум (ПМЭФ) кэмигэр ыытыллыбытын иһитиннэрдэ. Онно ДНӨ баһылыга Денис Пушилины кытта көрсүбүтэ. Өрүттэр эрэгийиэннэр икки ардыларынааҕы бииргэ үлэлээһини, Арассыыйа Дьоруойа Андрей Григорьев-Тута туһунан уус-уран киинэни устуу боппуруостарын дьүүллэспиттэрэ. Киинэни устарга ДНӨ көмөлөһүөҕэ диэн этэр.

Маныаха Ил Дархан маннык хардарыта сибээстээх үлэлээһиҥҥэ номнуо үөрүйэх баарын бэлиэтээтэ. Ол курдук, ПМЭФ Запорожье уобалаһын губернаторын кытта «Алдан» киинэни устарга кэпсэтии ыытыллыбытын аҕынна. Санатар буоллахха, бу  байыаннай дьайыы дьоруойдарын туһунан толору метражтаах «Алдан» киинэ дьон-сэргэ көрүүтүгэр тахсыбыта.