“Арассыыйа хаһаактара” бырайыак салайааччыта Игорь Шарапов Уһук Илиҥҥэ сырытта

Уһук Илин эрэгийиэннэригэр “Арассыыйа хаһаактара” бырайыак салайааччыта Игорь Шарапов ыалдьыттаата.

«Арассыыйа хаһаактара» бырайыак чэрчитинэн, интэриниэт ситимигэр хаһаактар олохторун, култуураларын, үгэстэрин билиҥҥи үйэҕэ байыаннай тутулларын туһунан чахчылары түмэр портал оҥоһуллуохтаах. 2021 сылга Арассыыйа Бэрэсидьиэнин хаһаактар дьыалаларынан дьарыктанар Сэбиэтэ хаһаактары түмэр биир кэлим медийнэй былаһаакка оҥоһуллара ирдэнэр диэн быһаарбыта. Бу 2030 сылга диэри былааннаммыт Арассыыйа хаһаактарын сайыннарыыга туһаайыллыбыт судаарыстыбаннай стратегиятын тула түмсүү биир түһүмэҕэ буолар.

Уһук Илиҥҥи Федеральнай уокурукка хаһаак  икки войската баар – Забайкальскай уонна Уссурийскай. Ону кытта хаһаактар 150  түмсүүлэрэ үлэлииллэр, ол иһигэр Саха сиригэр. Игорь Шарапов Читаҕа Забайкальскай  войска атамаанын Сергей Боброву, Хабаровскайга Уссурийскай  войска атамаанын Александр Агибаловы кытта көрүстэ, Уһук Илиҥҥи уокурук хаһаактарын билиҥҥи туруктарын туһунан билистэ.