Арассыыйа Илин диэки хайыһар

Арассыыйа уонна Кытай икки ардыгар дипломатическай уонна экэнэмиичэскэй сибээһи олохтооһун бу икки дойдуга туһаны аҕаларын туһунан Петербурдааҕы экэнэмиичэскэй пуорумҥа ырыттылар.

Тэрээһиҥҥэ сүүстэн тахса араас дойду эспиэрдэрэ санааларын атастылар. Үгүстэр Арассыыйаттан арҕаа дойдулар ырыынактара барбыттара биллибэккэ хаалбытын, дойду экэнимэмикэтэ сайдыытыгар сыһыаннаах сонун бырайыактар көмүскэммиттэрин биһирии ылыннылар.

РФ Уһук Илин уонна Арктика сайдыытын миниистирэ Алексей Чекунков дойду  Уһук Илин эрэгийиэнигэр  урутаан сайдыы хайысхата сайдыытын, холбоһуктаах тэрилтэлэр үлэлэрин, Кытайы кытта электро-тырааныспарга, электро-эниэргийэҕэ, агропромышленнай бырайыактарга туһуламмыт бииргэ үлэлээһин бара турарын бэлиэтээтэ.

СӨ Аҕа баһылыга Айсен Николаев: «Биһиги Кытайтан чугаспыт  уонна  экэнэмиичэскэй сибээспит бииргэ үлэлээһини ирдииллэр. Ааспыт сылга 3 миллиард дуоллартан тахса суумаҕа табаары атастаһыы бэлиэтэннэ. Онон кэскиллээх сайдыы өссө да иннибитигэр», — диэн бэлиэтээтэ.