Арассыыйа исписэлиистэрэ Саха сирин эмчиттэрин үрдүктүк сыаналаатылар

Алтынньы саҥатыгар РФ Доруобуйа харыстабылыгар министиэристибэтин “Фтизиопульмонология уонна  сыстыганнаах ыарыылар национальнай мэдиссиинискэй чинчийэр кииннэрин”  исписэлиистэрэ Саха сиригэр үлэлээтилэр.

Арассыыйа эспиэрдэрэ Дьокуускайга сыстыганнаах ыарыыларга оҕо килиниичэскэй балыыһатын, Дьокуускайдааҕы килиниичэскэй балыыһа, СПИД-ы сэрэтиигэ уонна охсуһууга  өрөспүүбүлүкэтээҕи киин, Горнай улууһун Оройуоннааҕы киин балыыһатын, Дьокуускай куорат мэдиссииниҕэ киинин уонна Е.Н.Андреев аатынан “Фтизиатрия” научнай-бырактыычаскай киинин үлэтин билистилэр.  Кинилэр биир нэдиэлэ устата сыстыганнаах ыарыылаахтарга мэдиссиинискэй көмөнү тэрийиини, ыарыыны быһаарыы уонна эмтээһин ньымаларын үөрэттилэр. Ону таһынан, биллэн турар, быраастарга уонна мэдиссиинэ сиэстэрэлэригэр  сүбэни-аманы биэрдилэр, мэдиссиинэ тэрилтэлэригэр информатизацияны киллэрии боппуруостарын дьүүллэстилэр.

Көһө сылдьар тэрээһиннэр түмүктэринэн,  СӨ бырабыыталыстыбатын бэрэссэдээтэлин бастакы солбуйааччы Георгий Степановы кытары көрсүһүүгэ эспиэрдэр бөлөхтөрүн салайааччы “сыстыганнаах ыарыылар” хайысхаҕа мэдиссиинискэй көмөнү оҥоруу үрдүк таһымнааҕын бэлиэтээтэ.

СӨ доруобуйа харыстабылыгар миниистирэ Лена Афанасьева түмүккэ:

— Инфекционистар уонна фтизиатрдар үлэлэрин маннык үрдүктүк сыаналааһын  биһиги инники сайдыыбытын көҕүлүүр”, — диэн биир идэлээхтэригэр өйөбүллэрин уонна бииргэ үлэлээһиннэрин иһин махтанна.