Арассыыйа мөлтөхтүк көрөр оҕолордоох дойдуларга үһүс буолбут

Мөлтөх харахтаах ыччаттаах үс дойду иһигэр, хомойуох иһин, Арассыыйа эмиэ баар.

Бастакы миэстэни Япония ылар, онно оҕо 86%-на миопиялаах – ырааҕы куһаҕаннык көрөр, салгыы Соҕуруу Корея (73,9%), ол кэнниттэн Арассыыйа (46%) кэлэр. Бу Кытай учуонайдарын чинчийиилэрин түмүгүн  British Journal of Ophthalmology билим сурунаала таһаарбыт диэн иһитиннэрэр rg.ru

Аан дойду үрдүнэн харах быраастара ыччат туох да хонтуруола суох гаджетынан үлүһүйэр буолан, миопия тарҕанан эрэрин бигэргэтэллэр.

Араас дойдулар статистикалара көрдөрөрүнэн, 5-18 саастаах оҕолорго миопия тарҕаныыта 30,47% тэҥнэспит.

Кытай учуонайдара биири бэлиэтии көрбүттэр: ырааҕы куһаҕаннык көрүү ордук 13-18 саастаах улаатан эрэр оҕолорго, чуолаан кыргыттарга уонна куоракка олорооччуларга элбэх эбит. Мантан сиэттэрэн, учуонайдар чугастааҕы кэлэр кэми быһа барыллаан көрдүлэр. 2025 сыллаахха Сиргэ 19 сааһыгар диэри ырааҕы куһаҕаннык көрөр 740-тан мөлүйүөн киһи баар буолуо, ол эбэтэр бу саастаах бөлөх 40%-на.

РФ Доруобуйа харыстабылын сүрүн штаты таһынан офтальмолога Владимир Нероев биэрбит дааннайынан, 2024 сылга Арассыыйаҕа 100 тыһ оҕоттон 14,1 оҕото уопсайынан хараҕа ыалдьар. Бу сүрүннээн миопия. Төрүөхтэриттэн 14 саастарыгар диэри оҕо 35,1%-на ыалдьар, оттон 15-17 саастаахтар — 59,3%-нара.

Учуонайдар бу көстүүнү генетическэй уларыйыы олус бытааннык барарынан, генетикаҕа түһэрбэттэр. Бу барыта гаджеты сиэрэ суох туһаныыттан тахсыбыт көстүү дииллэр.

Ырааҕы куһаҕаннык көрүүгэ тиийбэт туһуттан, быраастар оҕолору мониторга мээнэ олордумаҥ итиэннэ “20-20-20 быраабыланы” тутуһуннара үөрэтиҥ диэн сүбэлииллэр:

20 мүнүүтэ буола-буола тохтооҥҥут, быһа холуйан 6 миэтэрэ тэйиччи турар эбийиэги 20 сөкүүндэ устата одуулаһыҥ – бу харах ноҕоруускатын аччатыа уонна сынньатыа.