Арассыыйа норуодунай учуутала Виктор Потапов — «Гражданскай килбиэн» бэлиэ хаһаайына!

Арассыыйа норуодунай учууталыгар Виктор Потаповка үөрүүлээх быһыыга-майгыга «Гражданскай килбиэн» бэлиэ туттарылынна!

Арассыыйа норуодунай учуутала Виктор Филиппович Потапов 75 сааһын туолбутунан, бүгүн Дьокуускайга үөрүүлээх быһыыга-майгыга чиэстээтилэр. СӨ Ил Дархана Айсен Николаев тус бэйэтэ уһулуччулаах педагогу истиҥник эҕэрдэлээтэ уонна үүнэр көлүөнэни иитиигэ, үөрэтиигэ, ону сэргэ өрөспүүбүлүкэ социальнай-экэнэмиичэскэй сайдыытыгар сүҥкэн кылаатын бэлиэтээн туран, «Гражданскай килбиэн» бэлиэнэн наҕараадалаата.

—Виктор Филиппович — үтүөкэн учуутал. ССРС норуодунай учуутала Михаил Андреевич Алексеев үөрэнээччитэ, дьыалатын салҕааччы. Муударай уһуйааччы, бэйэтин идэтин уонна үөрэнээччилэрин ис сүрэҕиттэн таптыыр учуутал. Кини олоҕун талааннаах, толкуйдаах, күүстээх санаалаах көлүөнэлэри иитиигэ анаата. Кини билиини биэриитэ, хас биирдии оҕоҕо ытыктабыллаах сыһыана, физикаҕа таптала оскуола сүрүн тирэҕинэн буолар. Сүүһүнэн махталлаах үөрэнээччилэр, олимпиадаларга кыайыылар, кэллиэгэлэрин ытыктабыллара, өрөспүүбүлүкэ билиниитэ — бу сыралаах үлэ түмүгэ, — диэн бэлиэтээтэ Ил Дархан. Кини үбүлээргэ чэгиэн доруобуйаны, үлэҕэ ситиһиилэри уонна махталлаах үөрэнээччилэри баҕарда.

Үөрүүлээх тэрээһиҥҥэ үрдүкү салалта бэрэстэбиитэллэрэ, үбүлээр кэллиэгэлэрэ, аймахтара, выпускниктар, өрөспүүбүлүкэ уопсастыбаннаһа кытыннылар. Виктор Филипповичка үбүлүөйүнэн Ил Түмэн Грамотатын, Дьокуускай куорат дьаһалтатын Бочуотунай Грамотатын уонна «Отличник инноваций Республики Саха (Якутия)» бэлиэни дохсун ытыс тыаһыгар доҕуһуоллатан туттардылар.

Виктор Потапов Өрөспүүбүлүкэтээҕи лиссиэйгэ 1996 сылтан физика учууталынан үлэлиир. Кини салалтатынан уонунан үөрэнээччи үрдүк ситиһиилэммитэ:  тоҕус үөрэнээччитэ БКЭ физиканы 100 баалга туттарбыта, элбэх үөрэнээччитэ дойду бастыҥ үрүк үөрэҕин кыһаларыгар, МФТИ уонна МГУ үөрэхтэрин салҕаабыттара.

Педагог «Туймаада» үөрэнээччилэргэ ыытыллар норуоттар икки ардыларынааҕы олимпиадаларын тэрийиигэ, физика-математика пуорумнарыгар, оскуолаларга ыытыллар күрэхтэһиилэргэ көхтөөхтүк кыттар. Маны сэргэ,  Саха сирин талааннаах, дьоҕурдаах оҕолорун өйүүр «Дьоҕур» уопсастыбаннай түмсүүнү төрүттээччилэртэн биирдэстэрэ.

—Үөрэнээччилэрим үүнэн-сайдан тахсалларын көрөрүм миэхэ улахан суолталаах. Бу буоллаҕа бастыҥ наҕараада. Саҥа үлэлээн эрэр эдэр учууталларга, бу олус наадалаах, туһалаах  дьыалаларыгар — оҕолору үөрэтэр уонна иитэр үлэлэригэр ситиһиилэри баҕарабын. Кинилэр үлэлиир усулуобуйалара биллэ тупсаҕай буоларыгар, бырабыыталыстыба уонна министиэристибэ эдэр педагогтары өйүүрүгэр, улахан кыһамньы уурулларыгар эрэнэбин. Хас биирдии учуутал талан ылбыт оскуолатыгар үлэлиир эрэ буолбакка, идиэйэтин олоххо киллэрэрэ, хас биирдии үөрэнээччи кыаҕын, дьоҕурун арыйара суолталаах. Эдэр учууталларга эрэллээх, тулуурдаах буолалларыгар уонна үлэлэриттэн дуоһуйууну, үөрүүнү ылалларыгар баҕарабын, — диэтэ Виктор Потапов.

Сиһилии: https://www.sakha.gov.ru/news/4696 манна ааҕыахха сөп.

СӨ Ил Дарханын уонна Бырабыыталыстыбатын пресс-сулууспата

Хаартыскаҕа  Андрей Сорокин түһэриитэ, СИА