Сорох Арассыыйа олохтоохторо балаҕан ыйыттан учаастактарын былдьатыахтарын сөп

Бу сыл балаҕан ыйын 1 күнүттэн саҕалаан Арассыыйаҕа көрүүтэ-харайыыта суох сир учаастактарын былдьаан ылыыга саҥа ирдэбиллэр үлэлиэхтэрэ.

Олоххо киллэриллэр быраабылаларынан, сокуонунан бэриллибит болдьоххо сир учаастагар тутуллубут уонна регистрацияламмыт эбийиэк суоҕа сири былдьаан ылыыга биир төрүөтүнэн буолуоҕа. Бу туһунан Судаарыстыбаннай Дуума Тутууга уонна ОДьКХ кэмитиэтин бэрэссэдээтэлин солбуйааччыта Сергей Колунов иһитиннэрдэ.

«Арассыыйаҕа балаҕан ыйын 1 күнүттэн көрүүтэ-харайыыта суох сир учаастактарын былдьаан ылыыга саҥа ирдэбиллэр үлэлиэхтэрэ. Холобур, бэриллибит болдьоххо тутуллубатах уонна регистрацияламматах эбийиэк суоҕа былдьаан ылыыга төрүөт буолуоҕа. Тутууга анаммыт сиргэ – биэс сыл, оттон чааһынай дьиэ тутуутугар – сэттэ сыл», – диэн Колунов этиитин РИА Новости суруйар.

Сири былдьаан ылыы атын төрүөттэринэн буолаллар: учаастак иэнин аҥаарыттан ордуга бөҕүнэн-сыыһынан, тобоҕунан туоллаҕына уонна бу сокуону кэһии биир сыл иһигэр туоратыллыбатаҕына.

Ону таһынан, тутуулары сөптөөҕө суохтук көрөр-харайар иһин учаастактары былдьыахтара: холобур, истиэнэлэрэ алдьаммыт, түннүктэрэ суох эбэтэр да атын маныаха маарынныыр кэһиилэр баар буоллахтарына.