Арассыыйа Төрүт сокуонугар уларыйыылар киирдилэр

РФ бэрэсидьиэнэ Владимир Путин Арассыыйа Төрүт сокуонугар уларыйыылар киирбиттэринэн, бэҕэһээ саҥа тиэкиһи бэчээккэ таһаарарга эттэ. Владимир Владимирович хас да федеральнай конституционнай сокуоннарга илии баттаан турар.

– РФ Конституциятыгар, 65 ыстатыйатын 1 чааһыгар, уларытыылар киирбиттэринэн сибээстээн саҥа тиэкиһи бэчээттииргэ, – диэн этэр Владимир Путин ыйааҕар. Санатан эттэххэ, Конституция 65 ыстатыйатын 1 чааһыгар федеративнай тутул суруллар.

РФ бэрэсидьиэнин ыйааҕынан туох саҥа уларыйыылар киирдилэрий?

Бастатан туран, Донецкай, Луганскай Народнай Өрөспүүбүлүкэлэр, Запорожье, Херсон уобаластара Арассыыйа састаабыгар киирэллэрин туһунан дуогабардары ратификациялааһын сокуоннара олоххо киирдилэр. Иккиһинэн, бэрэсидьиэн бу эрэгийиэннэри Арассыыйаҕа ылыы туһунан федеральнай конституционнай сокуоннарга илии баттаата. Өрөспүүбүлүкэлэр уонна уобаластар ааттара Конституцияҕа уларыйбакка киириэхтэрэ. Үсүһүнэн, эрэгийиэннэр салайааччыларын быстах кэмҥэ толорооччулары анаата. Ол курдук, бэрэсидьиэн ыйааҕынан Денис Пушилин, Леонид Пасечник, Евгений Балицкай уонна Владимир Сальдо Арассыыйа саҥа эрэгийиэннэрин баһылыктарын эбээһинэһин быстах кэмҥэ толорооччунан ананнылар. Төрдүһүнэн, Запорожье уобалаһыгар атомнай энергияны туһаныы туһунан туспа ыйаах таҕыста.