Арассыыйа туриһа Кытайга хайдах төлөһөн сылдьыаҕай? ATOР саамай табыгастаах ньымалары ыйда

Балаҕан ыйын 15 күнүттэн Кытайга визата суох тахсар кыах баар буолла.

Онон элбэх турист тахсаары оҥосто сырыттаҕа. Дьэ манна кини саамай эрэллээх уонна боростуой көрүҥнэринэн — кумааҕы юаньынан, UnionPay каарталарынан, ону тэҥэ анал сыһыарыыларга регистрацияланан QR-кодунан төлөһөн сылдьыан сөп диэн Арассыыйа турэпэрээтэрдэрин ассоциацията (ATOР) “Российскай газетаҕа” иһитиннэрэр.

Бу дойдуга QR-кодунан төлөөһүн баһыйар буолбут, оттон каарталар уонна “нал” харчы кэтэххэ үтүрүллүбүттэр. Ол да буоллар туттуллаллар.

Кумааҕы харчы

Төлөбүргэ саамай судургу ньыма – Кытайга кумааҕы харчылаах кэлии. Ол хайаан да дуоллар, евро буолбатах. Кытай юаньа билигин Арассыыйаҕа туох да үспүкүлээннээһинэ суох ханна баҕарар атыыланар.

Кытай улахан куораттарыгар кумааҕы харчыны ханна баҕарар, хаһан баҕарар ылаллар. Арай бытарытыыга, атастаһыыга эрэйи көрөҕүн. Юаньы Арассыыйаҕа атыылаһар буоллаххына, бааннар 5-тээх, 10-наах, 20-лээх  юаньы буолбакка, саамай улахан номиналлаах 100-тээх юаньы биэрэллэр. Ону Кытайга сорох маҕаһыыннар кыайан бытарыппаттар.

Каарталар

Арассыыйа бааннара биэрбит каартатын Кытайга эмиэ туттуохха сөп. Ол гынан баран “Мир” буолбакка, UnionPay — кытай төлөһөр систиэмэтин каартатын туһунан этиллэр. Сүрүнэ, бааныҥ сааҥсыйаҕа түбэспэтэх буолуохтаах. Арассыыйаҕа билигин икки эрэ баан ордо сылдьар – Россельхозбаан уонна АТБ. Каартанан Пекин метротугар төлөһөргө үчүгэй, чэпчэтиигэ да түбэһиэххин сөп. Төлүүргэр пин-коду көрдүүллэр. Кытайга пин-код алта сыыппаралаах, онон түөрт бэйэҥ туттар сыыппараҥ кэнниттэн икки нуулу эбэн биэрэҕин. Ол эрээри туристар каартаны сорох сиргэ ылбаттар диэн суруйаллар. Кытайдар бэйэлэрэ каартаны массыына курдук бөдөҥ атыыга туһаналлар эбит.

QR-кодтар

Кытайга саамай тарҕаммыт сыһыарыынан AliPay уонна WeChat диэн ааттанар супер-сыһыарыылар буолбуттар, олору электроннай көһүлүөк быһыытынан эмиэ тутталлар. Сыһыарыылары олохтоохтор эрэ буолбакка, омуктар, ол иһигэр Арассыыйа дьоно эмиэ туһаныахтарын сөп. Регистрацияланыы судургу, эбиитин кытай сим-каартатын ылар наадата суох.

Уопуттаах туристар AliPay сыһыарыыны туттары сүбэлииллэр. Ол курдук  сыһыарыыга бэйэҥ дааннайдаргын, загранпааспарыҥ сканын уонна сирэйиҥ хаартыскатын ыытан баран, регистрацияны уонна идентификацияны тэйиччиттэн олорон ааһаҕын.

AliPay-га харчыны көһөрөргө — Кытайга билэр дьонноох буоллаххына, кинилэр көмөлөһүөхтэрин сөп, ону тэҥэ Арассыыйа бөдөҥ бааннара эмиэ оҥороллор. Көһүлүөгү омук бааннарын нөҥүө эмиэ толоруохха сөп.

Оттон WeChat-ка регистрацияланарга бу сыһыарыынан туһанар кытай киһитэ наада – кини поручитель буолар. Маннык киһини булар уустуга суох дииллэр, сорохтор хайыы-үйэ харчы оҥостор буолбуттар.