Арассыыйа учуонайдара социальнай архитектураҕа аан дойдуга бастакы үөрэх кинигэтин билиһиннэрдилэр

Санкт-Петербургтааҕы судаарыстыбаннай университекка «Социальнай архитектура: социальнай уларыйыылар теориялара уонна быраактыкалара» норуоттар икки ардыларынааҕы научнай-практическай кэмпириэнсийэ кэмигэр социальнай архитектураҕа аан дойдуга бастакы үөрэх кинигэтин билиһиннэрдилэр.

Таһаарыы ааптардарын кэккэтигэр учуонайдар уонна эспиэрдэр киирбиттэр, олор истэригэр М. В. Ломоносов аатынан МГУ политологияҕа факультетын бэрэпиэссэрэ Сергей Володенков баар. Бу туһунан www.sakha.gov.ru сайт суруйар.

«Бу көннөрү үөрэх кинигэтэ буолбатах,  Арассыыйаҕа саҥа билии уонна  үлэ эйгэтигэр анаммыт бастакы  научнай-методическай кинигэнэн буолар. Бу үлэ  судургу, ол эрээри олус суолталаах», – диэн Сергей Володенков бэлиэтээтэ.

Үөрэх кинигэтин билиһиннэрэн туран, Сергей Володенков таһаарыы уопсастыба сайдыытын аныгы кэрдиис кэмин ирдэбиллэригэр сөптөөхтүк эппиэттиир дьиссипилиинэлэр икки ардыларынааҕы эйгэ быһыытынан социальнай архитектура концептуальнай олохторун, сыал-сорук тускулларын, методологическай аппараатын уонна инструментальнай ньымаларын тиһиктэхтик төрүттүүргэ аналлаах фундаментальнай үлэ буоларын бэлиэтээтэ.

Арассыыйа кэскилин национальнай приоритеттарын чэрчитинэн өйдөөн-дьүүллээн көннөрөр уонна оҥорон тутар кыахтаах саҥа көлүөнэ идэлээхтэри бэлэмнииргэ туһуланар. Арассыыйа чинчийээччилэрин инновационнай үлэлэрин страницаларыгар бастыҥ дойдутааҕы уонна норуоттар икки ардыларынааҕы уопуту холбуур социальнай архитектура теоретическай олохторо уонна практическай моделлара  системаламмыттар.

Санкт-Петербурга ахсынньы 5-6 күннэригэр ыытыллыбыт «Социальнай архитектура: социальнай уларыйыылар теориялара уонна быраактыкалара» кэмпириэнсийэ 27 дойдуттан 600 чинчийээччини, эспиэри уонна бэлитиичэскэй институттар бэрэстэбиитэллэрин муста. Кыттааччыларга эҕэрдэ тылы Арассыыйа бэрэсидьиэнэ Владимир Путин ыытта. Кини дойду социоархитектурнай бырайыактары олоххо киллэриигэ баай уопуту мунньуммутун уонна тас дойду партнердарын кытта мунньуммут уопутуттан үллэстэргэ бэлэмин эттэ.