Арассыыйа уонна Аляска икки ардыларыгар туннель тутуллуон сөп

Арассыыйаны уонна Алясканы Беринг силбэһиитинэн холбуур туннель аҕыс сылтан кыра болдьоххо тутуллуон сөп.

Бу санааны Арассыыйа бэрэсидьиэнин тас дойдулары кытта экономическай бииргэ үлэлээһиҥҥэ анал бэрэстэбиитэлэ уонна Арассыыйа инвестицияҕа пуондатын (РДИФ) генеральнай дириэктэрэ Кирилл Дмитриев эттэ.

«АХШ-ы уонна Арассыыйаны Путин-Трамп туннелынан холбуур туһунан санаан көрүҥ – сомоҕолоһууну бэлиэтиир 70 миилэлээх муостаны,»- диэн  Дмитриев социальнай ситимҥэ эппитин ТАСС  суруйар.

Кини этэринэн, туннель сыаната 65 млрд дуоллартан тахса буолуон сөп, ол гынан баран Илон Маск The Boring Company (тоннель тутуутун технологияларын сайыннарар уонна тарҕатар) технологията ороскуоту 8 млрд дуолларга диэри түһэриэн сөп.

Дмитриев итинник туннель, тимир суол уонна таһаҕас тырааныспарын ситиминэн ааһан, ресурсаны бииргэ сайыннарыыга суолу арыйарын бэлиэтээтэ. Итини тэҥэ, Арассыыйа-Эмиэрикэ бырайыактара үлэ миэстэтин таһаараллар, экэниэмикэни көҕүлүүллэр диэтэ.

«РФПИ Арассыыйа уонна Кытай икки ардыларыгар бастакы тимир суол муостатын туппута. Киһи аймах устуоруйатыгар аан бастаан континеннары — Арассыыйаны уонна АХШ-ы холбуур кэм кэллэ», — диэн Дмитриев эттэ.