Арассыыйа уонна Украина Стамбулга буолбут саҥа кэпсэтиилэргэ туох туһунан сөбүлэстилэр?

От ыйын 23 күнүгэр Стамбулга Арассыыйа-Украина кэпсэтиилэрин үһүс түһүмэҕэ буолан ааста. Дэлэгээссийэлэр туох туһунан сөбүлэспиттэрин туһунан РБК иһитиннэрдэ.

Кэпсэтиигэ дэлэгээссийэлэр биир ый аҥаарын анараа өттүгэр буолбут көрсүһүүгэ атастаспыт, дьүүллэһии туһунан меморандумнарын ырыппыттар. Арассыыйа дэлэгээссийэтин састаабын уларыппатах — бастакы икки түһүмэхтэргэ буоларын курдук хаалбыт.

Кэпсэтэр бөлөххө бэрэсидьиэн көмөлөһөөччүтэ Владимир Мединскэй салайааччылаах түөрт киһи, оттон эспиэрдэр бөлөҕөр өссө түөрт киһи киирбит. Украина дэлэгээссийэтин уруккутун курдук Рустем Умеров салайбыт. Кини нэдиэлэ анараа өттүгэр Оборуона миниистирин дуоһунаһыттан уурайан, Национальнай куттал суох буолуутун уонна оборуона сэбиэтин сэкирэтээринэн анаммыт; дэлэгээссийэ састаабыгар Тас сибээс министиэристибэтин, Украина Сэбилэниилээх күүстэрин, Украина Куттала суох буолуутун сулууспатын уонна разведка бэрэстэбиитэллэрэ киирбиттэр.

Кэпсэтиилэр чаас аҥаара кэриҥэ устата ыытыллыбыттар. Арассыыйа дэлэгээссийэтин баһылыга, бэрэсидьиэн көмөлөһөөччүтэ Владимир Мединскэй Москва тугу этии киллэрбитин бэлиэтээтэ. Бэрэсидьиэннэр көрсүһүүлэрин туһунан эттэххэ, онно анаан эйэлээх сөбүлэҥи ситэрэн-хоторон бэлэмниэхтээхтэр.

«Бу көрсүһүүгэ сөбүлэҥи түһэрсэн, түмүк оҥорон, илии баттыахтаахпыт», — диэн Мединскэй эттэ уонна өрүттэр кэпсэтии төрдүс түһүмэҕин ыытыахтара диэн эрэнэрин биллэрдэ.

Кини бэлиэтээбитинэн, бэйэ-бэйэлэригэр ыыппыт меморандумнарынан өрүттэр хайысхалара «быдан ыраахтар», ол эрээри ол хайысханан сибээстэһии салҕаныаҕа.

Украинаны кытта кэпсэтии үһүс түһүмэҕин түмүгүнэн Владимир Мединскэй оҥорбут сүрүн этиилэрэ:

• — Кэпсэтии үһүс түһүмэҕэ түмүктэннэ, РФ урукку түһүмэхтэртэн гуманитарнай хайысхаларынан бары сөбүлэһиилэр толоруллубуттарын бэлиэтээтэ;
• — Бириэмэни уонна харчыны кэмчилиир инниттэн РФ онлайн үлэлиэхтээх үс үлэлиир бөлөҕү тэрийэри этии киллэрдэ;
• — Украина үлэлиир бөлөхтөр тустарынан РФ этиитин көрөргө сөбүлэстэ;
• — РФ уонна Украина лидердэрэ көрсүөхтэрин иннинэ, бастаан дьүүллэһии туһунан сөбүлэҥи ырытыахха наада;
• — РФ Путин уонна Зеленскай көрсүһүүлэрэ буоларын туһугар, үчүгэйдик бэлэмнэниэхтээҕин Украинаҕа тириэртэ;
• — РФ уонна Украина дьүүллэһии туһунан меморандумнары ырытар инниттэн сибээстэрин салгыахтара;
• — Меморандумнар тустарынан РФ уонна Украина позициялара билигин бэйэ-бэйэлэриттэн «ыраахтар»;
• — Билигин РФ уонна Украина хас биирдии өттүттэн 250-нуу киһинэн билиэннэйдэри атастаһыыны түмүктүүллэр;
• — РФ Украинаҕа  7 тыһ. тахса байыаһын өлүгүн төннөрдө уонна бэйэтин аҕыйах ахсааннаах байыастарын өлүгүн ылла;
• — Икки өттүттэн 1200 кэриҥэ киһинэн атастаһыы ыытыллыаҕа;
• — Байыаннай дьайыылар түмүгэр көһөрүллүбүт эйэлээх олохтоохтору төннөрүү боппуруоһа Украинаны кытта ырытылынна;
• — РФ сөбүлэһии 101 пууна тиһэҕэр диэри толоруллубатаҕын бэлиэтээтэ — Курскай уобалас олохтоохторо бары дьиэлэригэр төннүбэтилэр;
• — Украина Курскай уобалас 30 кэриҥэ эйэлээх олохтооҕун тутан олорор;
• — РФ Украина байыаннайдарын уонна атын категориялаах дьону Курскай уобалас олохтоохторугар атастаһарга бэлэм;
• — Билигин «серай зонаҕа» дроннар  кутталларыттан санитарнай хамаандалар улахан кутталга киирэллэр — РФ хас биирдии олох күндү;
• — РФ фронт лииньийэтигэр кылгас кэмнээх гуманитарнай тохтобулларга төннөргө этии киллэрэр.