Арассыыйа устудьуоннарын күнүн көрсө Айсен Николаев стипендиаттары кытта көрүстэ

Тохсунньу 21 күнүгэр Дьокуускайга Саха сирин Ил Дархана Айсен Николаев Арассыыйа устудьуоннарын күнүгэр – Татьяна күнүгэр анаан, ааттаах стипендиаттары кытта көрсүһүүнү ыытта.

Тэрээһиҥҥэ регион үрдүк үөрэҕин кыһаларыгар уонна дойду бастыҥ университеттарыгар сыаллаах бэлэмнэнии бырагыраамаларынан үөрэнэр устудьуоннар кытыннылар. Бу туһунан www.sakha.gov.ru сайт иһитиннэрэр.

Мустубут дьоҥҥо туһаайан, салайааччы ааттаах стипендиялар систиэмэлэрэ — талааннаах ыччаты судаарыстыба өйүүр биир саамай суолталаах көрүҥэ уонна уһун болдьохтоох каадыр бэлиитикэтин тутаах чааһа буоларын  эттэ. Саха сирин бэрэсидьиэнин бастакы  стипендията 1994 сыллаахха олохтоммута, оттон бастакы стипендиаттар 1995 сыллаахха баар буолбуттара. Бырагыраама үлэлиэҕиттэн ыла, уопсайа 573 киһи стипендиат буолла.

«Бүгүн Саха сирэ эрэ буолбакка, дойду бүтүннүүтэ биһиги култуурабыт маастардарыттан саҥа ситиһиилэри, саҥа кыайыылары күүтэр», — диэн кини бэлиэтээн эттэ. Ону таһынан, Айсен Николаев инфраструктура эрэ быһаарыытынан муҥурданар табыллыбатын, тутуллубут эбийиэктэр идэлээх каадырдарынан хааччыллыахтаахтарын бэлиэтээтэ. Онон сибээстэээн, сыыппара технологиялара уонна оҥоһуу өй (искусственнай интеллект) күүскэ сайдар кэмигэр, үрдүк хаачыстыбалаах үөрэхтээһин уонна билиини саҥардан иһии ураты суолталаналлар.

Көрсүһүүгэ ыччат уопсастыбаннай олоххо көхтөөх кыттыыларыгар болҕомто уурулунна. Өрөспүүбүлүкэ баһылыга ааттаах стипендиаттар өрөспүүбүлүкэни инники кэккэҕэ илдьэр саҥа көлүөнэ лидердэрин буолуохтарыгар эрэлин биллэрдэ уонна идэни баһылааһыны уопсастыбаннай олоххо көхтөөх кыттыыны кытта дьүөрэлиир улахан суолталааҕын  бэлиэтээтэ.

Түмүгэр Айсен Николаев устудьуоннарга эппиэтинэстээхтэрин уонна кыһамньылаах сыһыаннарын иһин махтанан туран, кинилэр бүгүҥҥү күнтэн өрөспүүбүлүкэ сайдыытын хамаандата буолалларын бэлиэтээтэ. Билиҥҥи туругунан, Саха сирин 15 биллиилээх судаарыстыбаннай уонна уопсастыбаннай диэйэтэллэрин ааттарынан сыл аайы 22 анал стипендия ананар.

Ааспыт сылга индексацияны учуоттаан, төлөбүр кээмэйэ 124 230 солкуобай буолбута. Бүгүн стипендиаттарынан дойду 16 бастыҥ үрдүк үөрэҕин кыһаларын устудьуоннара буолаллар: ааспыт сылга стипендияны 17 киһи, оттон быйыл 22 киһи ылла. Көрсүһүү түмүгүн таһааран,Ил Дархан өрөспүүбүлүкэ бастакы бэрэсидьиэнин Михаил Николаев оруолун санатан ааста. Киниэхэ үөрэхтээһин мэлдьи мөккүөрэ суох бастакы миэстэҕэ турбута. Ил Дархан билиҥҥи стипендиаттар, Саха сирин биллиилээх диэйэтэллэрин ааттарын сүгэннэр, эппиэтинэс суолтатын толору өйдүүллэригэр уонна өрөспүүбүлүкэ уонна дойду сайдыытыгар үтүө кылааттарын киллэриэхтэригэр эрэлин биллэрдэ.