Арассыыйа үөрэх хаачыстыбатынан уон бастыҥ дойду ахсааныгар киирбит

Биир кэлим эксээмэнтэн оҕолор билиилэрэ намтаата дииллэр эрээри, дойду Үөрэҕириитин министиэристибэтэ иһитиннэрэринэн, Арассыыйа үөрэх хаачыстыбатынан ТОП-10 киирбит.

Онтон норуоттар икки ардыларынааҕы үөрэнээччилэр олимпиадаларын түмүгүнэн букатын даҕаны биэс бастыҥнар кэккэлэригэр киирсэр үһү. Ол курдук, Арассыыйа оҕолоро норуоттар икки ардыларынааҕы олимпиадаҕа 31 кыһыл, 9 үрүҥ көмүс итиэннэ 2 боруонса мэтээли ылбыттар.

2015 сылы кытта тэҥнээтэххэ биир кэлим эксээмэн түмүгүн орто көрдөрүүтэ алта баалынан үрдээбит: 59,9 баалтан 66 баалга диэри, оттон мөлтөх үөрэнээччи ахсаана 25-тэн 15 % диэри түспүт.

Ааһан эрэр 2024 сылга Арассыыйаҕа барыта 114 оскуоланы уонна тоҕус уһуйааны туппуттар. 2019 сылтан дойду үрдүнэн барыта 1482 саҥа оскуола (итинтэн тоҕус оскуола коррекционнай) уонна 1685 оҕо саада баар буолбут.

Манна даҕатан эттэххэ, Ил Дархан үнүргү Анал туһаайыытыгар 2018 сылтан өрөспүүбүлүкэҕэ 171 үөрэх саҥа эбийиэгэ тутулунна (итинтэн 75 оскуола дьиэтэ, 81 уһуйаан) диэн иһитиннэрбитэ. Ааһан эрэр сыл түмүгүнэн 4200 миэстэлээх 15 оскуола, 315 миэстэлээх 4 уһуйаан, 4 оскуола спортивнай саалата үлэҕэ киириэҕэ диэн эппитэ. Онон түмүгү ирдиирэ оруннаах эбит.