Арассыыйа Дьоруойа Андрей Григорьевка вездеход бэлэхтээтилэр

Арассыыйа Дьоруойа үрдүк ааты ылбыт Андрей Григорьевы-Тутаны «Рысь» хампаанньа аатыттан салайааччы Валерий Шадрин эҕэрдэлиир:

— Мин социальнай ситимҥэ саха уола байыаннай дьайыыга сылдьан оҥорбут хорсун-хоодуот быһыытын  олус астына, киэн тутта аахпытым.  Андрей Григорьев-Тута элбэх оҕолоох дьиэ кэргэҥҥэ төрөөбүт,  бэйэтэ алта оҕо аҕата. Кини хорсун быһыытын сыаналаан, тохсунньу саҥата Ньурба улууһун дьаһалтатыгар сибээскэ тахсан уолу ыйыталаспытым. Андрей Григорьев-Тута куоракка кэлбитигэр Дьокуускай куорат дьаһалтатыгар ыҥыран көрсөммүт, бэйэбит оҥорон таһаарар вездехоппутун бэлэх ууммуппут.

Бу вездеходу кини дойдутугар, хаһаайыстыбатыгар туһаннын диэн бэлэхтээбиппит. Биһиги «Рысь» диэн вездехоттары оҥоруунан 2019 сылтан дьарыктанабыт. Хантараагынан байыаннай дьайыыга эмиэ ыытабыт. Уолбут бэҕэһээ дойду бэрэсидьиэнэ Владимир Путин илиититтэн Дьоруой сулуһун ылбытыттан наһаа үөрдүбүт, түгэнинэн туһанан эҕэрдэлиибит. Дьиэ кэргэҥҥэр дьолу, бары үтүөнү баҕарабыт.