Горнай бибилэтиэкэтэ бастыҥнар ортолоругар

Горнайдааҕы кииннэммит библиотечнай ситим кылаабынай библиограбын Анастасия Заровняева научнай үлэтэ бастыҥнар ортолоругар киирдэ. 

Сэтинньи 28 күнүгэр Москва куоракка Бүтүн Арассыыйатааҕы бибилэтиэкэлэр куонкурустарын түмүгэ таҕыста. Манна «Бастыҥ региональнай научнай үлэ» номинацияҕа библиограф Анастасия Ивановна Заровняева «Горный улус: история и современность (XIX-начало XXIв.)» үлэтэ кыайыылаҕынан ааттанна. СӨ национальнай бибилэтиэкэтин дириэктэрэ С.В.Максимова:»Арассыыйаҕа саамай саастаах бибилэтиэкэ үлэтин куонкуруһугар Саха өрөспүүбүлүкэтиттэн бастакынан кыайыылаах буоллугут», — диэн бэлиэтээтэ, эҕэрдэлээтэ.

Анастасия Ивановна Арассыыйа култууратын министиэристибэтин бочуоттаах дипломунан, 80 тыһ. бирииһинэн наҕараадаланна.

Үлэтигэр бэриниилээх, уопуттаах биир идэлээхпитин үлэтэ Арассыыйаҕа үрдүктүк сыаналаммытынан киэн туттабыт, ис сүрэхпититтэн эҕэрдэлиибит.

Анастасия Сергеева,

Бэрдьигэстээх, Горнай.