“Арассыыйаҕа духуобунай сиэр-майгы култуурата” биридимиэти түһүмэхтэринэн киллэриэхтэрэ

Дойду үөрэҕин министиэристибэтэ “Арассыыйаҕа духуобунай сиэр-майгы култуурата” оскуола үөрэҕин бырагырааматын киллэрии кыраапыгын чопчулаата. Биридимиэт түһүмэхтэринэн киириэҕэ: 2026-2027 үөрэх дьылыгар – 5-с кылаастарга, 2027-2028 үөрэх дьылыттан – 6-с уонна 7-с кылаастарга. Эрдэ, 2026 сылтан ити үс кылааска тэҥинэн киириэ диэн сабаҕалаабыттара.

Саҥа биридимиэт үөрэнээччилэри духуобунай сиэр-майгы сыаннастарыгар үөрэтэр соруктаах.

С.Н.Донской-II аатынан үөрэҕи сайыннарар уонна идэ таһымын үрдэтэр институт дириэктэрин эбээһинэһин толорооччу Юрий Шишигин бэлиэтээбитинэн, биридимиэти бу курдук түһүмэхтэринэн киллэрии судаарыстыба иитэр бэлиитикэтин уонна үөрэнээччи сааһын уратытын учуоттуур.

“Биһиги, 130 тахса омук түөлбэлээн олорор улууһугар бу биридимиэт улахан суолталаах. Саха сиригэр омуктар икки ардыларынааҕы сөпсөһүү уонна ыкса олорор ыалбыт култууратыгар ытыктабыл – күннээҕи олохпут сиэрэ. Маныаха духуобунай сиэр-майгы култуурата биридимиэт номнуо олоххо киирбит иитиигэ аналлаах бырайыактары салгыаҕа: “Дьоһуннааҕы кэпсэтии”, “Дьиэ кэргэн туһунан үөрэтии”, – диэн Шишигин бэлиэтиир.

Ону тэҥэ, быйыл балаҕан ыйын 1 күнүттэн, 5-с кылаастарга омук тылын үөрэтии үс чаастан нэдиэлэҕэ икки чааска диэри көҕүрүөҕэ. 2027 сыл балаҕан ыйын 1 күнүттэн ити курдук уларыйыы 6-с уонна 7-с кылаастарга киириэҕэ.

Орто сүһүөххэ чаас аҕыйааһына оҕо уйулҕата сааһынан уларыйыытын кытта сибээстээх диэн  Үөрэҕи сайыннарар уонна идэ таһымын үрдэтэр институкка эттилэр, бу түһүмэххэ сүрүн сорук – хаачыстыбалааах билиини иҥэрии уонна кээмэйи улаатыннарбаккка, оҕо үөрэххэ баҕатын намтаппат туһугар кыһаллыы буолар. Ол эрээри, оҕо туораттан, атын киһи көмөтө суох бэйэтин санаатын этэ, соруктарын толоро үөрэнэрин туһугар 8-9 кылаастарга ноҕурууска оннунан хаалар.

“Саха сиригэр билингвизм баар буолан (нуучча, саха уонна омук тылын үөрэтэллэр), оҕо тылы үөрэтэригэр улаханнык ноҕуруускаламмат уонна сөптөөх үөрэх былаанын оҥорорго көмөлөөх”, – диэн институт үлэһиттэрэ этэллэр.

Үөрэҕи сайыннарыы систиэмэтэ “Ыччат уонна оҕо” национальнай бырайыак ыытар соругугар сөп түбэһэн оҥоһуллар. Бу туһунан Үөрэх уонна билим министиэристибэтин пресс-сулууспата суруйар.