Арассыыйаҕа өрөбүл күн арыгыны атыылааһыны боборго туруорсаллар

Госдуума дьокутаата Андрей Свинцов (ЛДПР) Арассыыйаҕа өрөбүл күн арыгыны атыылааһыны бобор туһунан сокуон барылын оҥордо. Докумуону бэйэтин ТГ-ханаалыгар таһаарда. Бу туһунан РИА Новости суруйар.

Сокуон барылынан уларыйыыны «О государственном регулировании производства и оборота этилового спирта, алкогольной и спиртосодержащей продукции и об ограничении потребления (распития) алкогольной продукции» сокуоҥҥа киллэрии былааннанар. Ол курдук, «олохтоох бириэмэнэн 23.00 чаастан 8.00 чааска диэри арыгыны атыылааһын көҥүллэммэт» диэҥҥэ «ону таһынан өрөбүл күн (өрөбүлгэ)» диэн суруллубут.

Сокуон барылын быһаарыы суругар бүтэһик сылларга дойдуга арыгыны атыылааһын уонна арыгын иһии улаатыыта бэлиэтэнэр. Көҕүлээһин ааптара кэккэ эрэгийиэннэргэ арыгы бородууксуйатын атыылааһына хааччахтаммытын, ол иһигэр Вологодскай уобаласка уонна Бурятияҕа саҥа хааччахтар олохтонон киирбиттэрэ бэлиэтэнэр.

Парламент санаатынан, тапталлаах киһигин эбэтэр бүтүн дьиэ кэргэнин кытта арыгыта суох биир күн устата атаарыы оҕо төрөөһүнүн үрдэтиигэ күүстээх хамсааһыны тэрийиэҕэ. Свинцов этэринэн, өрөбүл күнү оҕолору кытта атаарыы, успуордунан, тапталлаах дьарыгынан умсугуйуу олус табыгастаах буолуо.