Арассыыйаҕа хас оҕо ахсын ийэ хапытаалын 25%-нан улаатыннаран иһиэххэ диэтилэр

Дьиэ кэргэни өйүүр Госдума кэмитиэтин баһылыга Нина Останина хас оҕо төрөөтөҕүн ахсын ийэ хапытаалын 25%-нан улаатыннаран иһиэххэ наада диэтэ.  Оччоҕо дойдуга оҕо төрөөһүнэ лаппа улаатыа этэ, диир.

“Бүгүн баар миэрэлэртэн саамай көдьүүстээхтэрэ – 2020 сыллаахха диэри бэриллибит ийэ хапытаала буолар, оттон бастакы оҕоҕо ийэ хапытаала бэриллэр буолбутун кэннэ, иккис оҕону төрөтүү харгыстаммыта”, — диэтэ Останина.

Дьокутаат этэринэн, дьиэ кэргэн ийэ хапытаалын 80%-нын дьиэ атыылаһыытыгар ыытар, онон ипотекаҕа киирэн баран иккис оҕону төрөтөр наада дуо диэн толкуйга түһэллэр.

“Ийэ хапытаалын бастакы оҕоҕо эрэ буолбакка, иккис, үһүс, салгыы төрүүр оҕолорго 25%-нан улаатыннаран биэрэн иһиэххэ наада. Оччоҕо эрэ оҕо төрөөһүнэ биллэрдик элбиэҕэ”, — диэн тоһоҕолоон бэлиэтээтэ парламентарий.