Арассыыйаҕа коронавирус саҥа көрүҥэ биллибит

Арассыыйаҕа 2023 сыл муус устарыттан атырдьах ыйыгар диэри кэмҥэ коронавирус саҥа көрүҥүнэн — EG.5 эбэтэр «эрис» ыалдьыы 17 түбэлтэтэ таҕыста.

Ыарыы биирдиилээн түгэннэрэ Москваҕа, Москва уобалаһыгар, Санкт-Петербурга, Магадан уонна Иркутскай уобаластарга, Краснодар кыраайыгар, Бурятияҕа уонна Хакасияҕа бэлиэтэннилэр.
Исписэлиистэр этэллэринэн, дойдуга коронавирус бу көрүҥэ «билиҥҥитэ киэҥник тарҕана илик». Ол гынан баран, эпидемиология балаһыанньата уустугурар куттала үөскүөн сөп.
Доруобуйа харыстабылын Бүтүн аан дойдутааҕы тэрилтэтэ биллэрэринэн, коронавирус саҥа көрүҥүн сибикилэрэ урукку коронавирустарга майгынныыр: сөтөл, тумуу, күөмэй ыалдьыыта, түөһү ыга тутар курдук ыарыы биллиитэ.