Арассыыйаҕа коронавирус саҥа «Стратус» көрүҥэ тарҕанан эрэр

Арассыыйаҕа билиҥҥи туругунан коронавирус XFG («Стратус») штаммынан ыалдьыы 114 түбэлтэтэ бэлиэтэннэ. Бу туһунан Роспотребнадзор иһитиннэрэр.

Билигин бэлиэтэнэринэн, ыалдьыы түбэлтэтин баһыйар өттө (54 бырыһыана) Москва куоракка тиксэр, ону таһынан атын эрэгийиэннэринэн эмиэ көстүбүттэр. Арассыыйаҕа ыалдьыы бастакы түбэлтэтэ муус устар 24 күнүгэр бэлиэтэммит.

«XFG („Стратус“) көрүҥэ – бу LF.7 уонна LP.8.1.2. көрүҥнэр холбоһууларын түмүгэр үөскээбит рекомбинантнай  көрүҥ. Сүрүн уратыта — түргэнник сыстар, сибикилэрэ сүрүннээн чэпчэкилэр (омикрон атын көрүҥэр майгынныыр), ураты бэлиэ быһыытынан үгүстүк күөмэй ыарыыта, куолас  суох буолуута бэлиэтэнэр», – диэн Роспотребнадзор Эпидемиологияҕа киин научнай-чинчийэр үнүстүүтүн геном чинчийиилэрин лабораториятын сэбиэдиссэйэ Камиль Хафизов эттэ.

Кини эбэн эппитинэн, XFG урукку штамнары кытта тэҥнээтэххэ ыарыыны уустугурдубат, ол эрээри араас дойдуларга түргэнник тарҕанар. Уопсастыба доруобуйатыгар билиҥҥи куттал намыһаҕынан сыаналанар.