Арассыыйаҕа коронавирус саҥа «Стратус» көрүҥэ тарҕанар

Дойдуга коронавирус саҥа «Стратус» көрүҥүнэн сүһүрүү түбэлтэтин ахсаана элбээн иһэр, билиҥҥи туругунан 384 киһи сыстыбыта бэлиэтэннэ.

Онуоха бу коронавирус көрүҥэ атын көрүҥнэртэн уратыта суох диэн Роспотребнадзор салайааччыта Анна Попова ТАСС-ка биэрбит интервьютугар эттэ.

«„Стратус“  көрүҥүнэн сүһүрүү ахсаана күн аайы элбиир, 300 да, 384 да буола сырытта, инникитин өссө элбиэҕэ. Ыарыы чэпчэкитик ааһар. Ордук сыстыганнаах, ол эбэтэр түргэнник тарҕанар. Коронавирус хас биирдии саҥа көрүҥэ уларыйан иһэр. Бүгүҥҥү күҥҥэ бу ыарыы уратытынан ордук сыстыганнаах буолуута буолар», — диэн кини эттэ. Ол эрээри, коронавирус дьаҥын содула араас буолуон сөп диэн Попова чопчулаата. Ол иһин сэрэтэр миэрэлэри тутуһуохха уонна бэйэ доруобуйатыгар харыстабыллаахтык сыһыаннаһыахха наада.