Арассыыйаҕа оҕо күүтэр устудьуоннар босуобуйаларын кээмэйэ үрдүө

РФ Бэрэсидьиэнэ Владимир Путин дойду Бырабыыталыстыбатыгар күнүскү өттүгэр үөрэнэр оҕо күүтэр устудьуон кыргыттарга босуобуйа кээмэйин тиийинэн олоруу алын кээмэйигэр диэри үрдэтэргэ сорудахтаата.

Бу туһунан РИА Новости суруйар. Туһааннаах сорудах былырыын ыытыллыбыт РФ Дьиэ кэргэттэрин социальнай өйөбүллэрин боппуруостарыгар судаарыстыбаннай Сэбиэт мунньаҕын түмүгүнэн Кириэмил саайтыгар таҕыста.

«РФ Бырабыыталыстыбатыгар профессиональнай, үрдүк үөрэх тэрилтэлэригэр уонна эбии профессиональнай үөрэхтээһин тэрилтэлэригэр уонна научнай тэрилтэлэргэ күнүскү өттүгэр үөрэнэр оҕо күүтэр устудьуон кыргыттарга оҕо күүтэр босуобуйа кээмэйин улаатыннарарга, ону таһынан олорор сирдэринэн олохтоммут үлэлиир нэһилиэнньэ тиийинэн олоруу алын кээмэйигэр диэри  улаатыннарарга сорудахтыыбын», — диэн докумуоҥҥа этиллэр.

Соругу толоруу болдьоҕо — бу сыл муус устар 15 күнүгэр диэри. Эппиэтинэстээх сирэй — дойду премьер- миниистирэ Михаил Мишустин.