Арассыыйаҕа оскуолаҕа 12 сыллаах үөрэҕи киллэрэр туһунан этии киллэрдилэр

Оскуолаҕа оҕолору 11 оннугар 12 сыл үөрэтэр итиэннэ алта саастарыттан оскуолаҕа ылар туһунан санааны Уопсастыбаннай балаата сэкирэтээрин солбуйааччы Владислав Гриб эппит. Бу туһунан ТАСС суруйар.

“Үгүс сайдыылаах дойдуларга курдук оскуолаҕа 12 сыллаах үөрэҕи киллэрэр уолдьаста. Уонна оҕолору оскуолаҕа алта саастарыттан ыыталыахха наада” – диэн Гриб эппит.

Кини бэлиэтииринэн, үөрэххэ ити курдук уларытыыны киллэриини кэм ирдиир. “Бу бүгүҥҥү күн ирдэбилэ. Оскуола бырагыраамата сыллата уустугуран иһэр, информация, биридимиэт, билим дьиссипилиинэлэрэ элбээн иһэллэр. Кэккэ дойдуларга оҥоһуу өйү букатын алын кылаастан үөрэтиэх курдуктар. Бу билиини 11 сыл үөрэтэр номнуо кылгас” – диэн Уопсастыбаннай балаата сэкирэтээрин солбуйааччы быһаарбыт.

Итини таһынан, элбэх оҕону биэс-алта саастарыттан маҥнайгы кылаас бырагырааматыгар бэлэмнииллэригэр Гриб болҕомтону туһаайбыт. “Уһуйаан, бэлэмнэнии бөлөх – үчүгэй, ол эрээри, систиэмэлээх үөрэҕи биһиги оскуолаҕа эрэ ылабыт. 12 уонна 6 сыл үөрэх – бу бүгүҥҥү күн ирдэбилэ, атын дойдуларга өссө сүүрбэ-отут сыллааҕыта киирбитэ” – диэн эппит.

12 сыллаах үөрэҕи киллэрии боппуруоһун көрөр уонна чугастааҕы биир-икки сылынан быһаарар наадатын ыйбыт. “Бу оскуола үөрэҕин уопсай хаачыстыбатыгар көмөлөөх буолуоҕа, онтон ол – университекка, орто анал үөрэххэ тирэҕинэн буолар” – диэн быһаарбыт.

Тустаах боппуруос Уопсастыбаннай балаатаҕа, Үөрэх Арассыыйатааҕы академиятыгар уонна Үөрэҕирии министиэристибэтин иһинэн уопсастыбаннай сэбиэккэ көхтөөхтүк ырытыллыаҕа диэн эппит. “Педагогтар уонна төрөппүттэр түмсүүлэрэ эмиэ кыттыһаллара буоллар” – диэн иһитиннэрбит.

АХШ, Франция, Кытай, Индия, Соҕуруу Кэриэйэ курдук дойдуларга оскуолаҕа 12 сыл үөрэтэллэр. Бу туһунан ТАСС суруйар.