Арассыыйаҕа вейп атыытын бобуохтара
![](https://sakha-sire.ru/wp-content/uploads/2024/06/vejp-900x596.jpg)
Госдуумаҕа дойду үрдүнэн вейп атыытын хааччахтыырга сокуон барылын киллэрдилэр.
Сокуон барылын ааптардара табахсыт ахсаана аҕыйаабытын үрдүнэн, сыллата вейп тардар дьон ахсаана элбиирин бэлиэтииллэр. Федеральнай сокуоҥҥа уларытыылары киллэрии дойдуга нэһилиэнньэ доруобуйатын тупсарыыга уонна никотиннаах убаҕастары атыытын толору бобууну хааччыйарга тиэрдиэҕэ диэн быһаараллар.
Эспиэрдэр сыаналыылларынан, Арассыыйа үрдүнэн 4 мөл. кэриҥэ киһи электроннай табаҕы тардар. Ону сэргэ РФ Доруобуйа харыстабылын министиэристибэтин дааннайынан, кэнники сылларга көннөрү табаҕы тардар дьонтон, вейп таптааччыларга ыччат ахсаана 10%-нан үрдүк. Оттон Үп-харчы министиэристибэтэ иһитиннэрбитинэн, 2023 сыл саҥатыгар никотиннаах убаҕастары атыы-эргиэн хайысхатыгар барыта 6,4 млрд солк. харчы эргийбит. Онуоха бырабыыталыстыбаҕа вейптарга толору бобуу киллэрии төттөрүтүн бу хайысхаҕа сокуону кэһии үрдүүрүн сабаҕалыыллар.
Вейптар, электроннай сигареталар көннөрү табахтан буортута суох диэн угуйаллар эрээри, киһи доруобуйатыгар улахан кутталы үөскэтэр диэн эспиэрдэр сэрэтэллэр. Электроннай табахтарга куһаҕан эттиктэр бааллар, ити барыта улахан тыҥа ыарыытыгар тиэрдиэн сөп.
Сообщить об опечатке
Текст, который будет отправлен нашим редакторам: