Арассыыйаҕа ыччат сааһын үрдэтиэхтэрин сөп

Арассыыйаҕа ыччат сааһын 35-тэн 40-45 сааска диэри үрдэтиэхтэрин сөп. Бу туһунан Илиҥҥи экэнэмиичэскэй пуорум кэмигэр «Көхтөөх киһи» платформа Кэтээн көрөр сүбэтин салайааччыта, РФ Үлэҕэ министиэристибэтин иһинэн Уопсастыбаннай сүбэ бэрэссэдээтэлэ Константин Абрамов иһитиннэрдэ.

«Мин  эспиэрдэри кытта ити этиини кытта сөбүлэһэбин. Дьиҥинэн, биһиэхэ киһи ситэр-хотор сааһа сыҕарыйда, кырдьар саас эмиэ оннук», — диэн Абрамов РИА Новости интервьютугар эттэ. Кини сокуоҥҥа ханнык баҕарар уларытыылар ымпыктаах-чымпыктаах чинчийиилэргэ уонна ааҕыыларга-суоттааһыннарга олоҕуруохтаахтарын  бэлиэтээтэ. Билигин Арассыыйаҕа 35 саастарыгар диэри гражданиннар ыччатынан ааҕыллаллар. Бу чэрчини кэҥэтэр көҕүлээһин социальнай уонна демографическай хамсааһыннары кытта сибээстээх.

Абрамов бэлиэтииринэн, ыччат сааһын быһаарыыга саҥа сыһыаннар үөрэх, дьарыктаах буолуу уонна эдэр ыаллары өйөөһүн эйгэтигэр судаарыстыбаннай бэлиитикэҕэ дьайыахтарын сөп. Онуоха кини маннык уларыйыылар сиһилии ырытыллыахтаахтарын санатта. Урут МГППУ «Үөрэх психологиятын» факультетын бэрэпиэссэрэ Л.Ф. Обухова аатынан саас психологиятын кафедратын доцена Дарья Красило аныгы көлүөнэ тоҕо улаатарга ыксаабатын быһаарбыта. Кини этэринэн, эдэр саас кэрдиис кэмин уһатыыга социальнай туруктар да, экэнэмиичэскэй төрүөттэр да көмөлөһөллөр.