Арассыыйаҕа ыт хаһаайыныгар холуобунай эппиэтинэһи киллэриэхтэрин сөп

Арассыыйаҕа иитиэх кыыл саба түһүүтүттэн алҕас киһи өлөр түгэнигэр, дьиэ кыылын хаһаайынын холуобунай эппиэтинэскэ тардар туһунан сокуону киллэриэхтэрин сөп. Бу туһунан «Известия» суруйар.

Саҥа сокуонунан үс сылга диэри көҥүллэрэ быһыллыан сөп. Кэлин дьиэ кыыллара киһиэхэ саба түһэр түгэннэрэ элбээтилэр, ол иһигэр өлүүгэ тиэрдиилээх түгэннэр, онон сокуон өйөнөрө ордук диэн эспиэртэр этэллэр.

«Известия» иһитиннэрэринэн, Холуобунай кодекска уларытыыны киллэрэр туһунан этиини Судаарыстыбаннай Дуума экологияҕа, айылҕа ресурсатыгар, тулалыыр эйгэни харыстааһыҥҥа кэмитиэтин бэрэссэдээтэлин солбуйааччы Владимир Бурматов көҕүлээбит.

“Бу саҥа нуорма ыстараап төлөөн баран куотунар, улаханнык накаастаммат дьиэ кыылын бас билээччилэргэ улахан сэрэтэр суолталаах буолуоҕа дии саныыбын. Өскөтүн Холуобунай кодекска хаһаайын көрбөккө дьиэ кыыла саба түһэн өлүүгэ тириэрдибитин туһунан ыстатыйа баар буоллаҕына, чахчы хаайыыга барыахтарын сөбүн туһунан өйдүөхтэрэ” – диэн дьокутаат быһаарбыт.

Ону тэҥэ, кини сокуоҥҥа өссө биир уларытыыны киллэрии бэлэмнэнэ сылдьарын, онно олоҕуран ыт хаһаайына суох сылдьар түгэнигэр ыстараабы 50 тыһ. солк. диэри үрдэтэр туһунан этиллиэҕин иһитиннэрбит. Бу туһунан «Известия» суруйар.