Арассыыйаҕа саахаланар туруктаах дьиэнэн билинии быраабылата саҥардылынна

Дойду Бырабыыталыстыбата элбэх кыбартыыралаах дьиэлэри хаарбах  уонна саахаланар туруктааҕынан билинии балаһыанньатыгар уларытыылары киллэрдэ.

Ол курдук элбэх кыбартыыралаах дьиэни хаарбах  уонна саахаланар туруктааҕынан  уопсай туругуттан көрөн  билиниэхтэрэ. Мантан инньэ туспа дьиэ конструкциятын көрөн  бу ыстаатыска таһаарыллыбат буолуоҕа.  Бу туһунан РФ Тутуу министиэристибэтин пресс-сулууспатыгар иһитиннэрдилэр.

Территорияны сайыннарыы пуонда (ФРТ) генеральнай дириэктэрэ Ильшат Шагиахметов  быһаарбытынан, саҥа быраабыланан олорор дьиэ-уот уопсай туругунан быһаарыллыаҕа, манна дьиэ атын биирдиилээн конструкциялара учуоттаммат. Хаарбах дьиэни  туһааннаах докумуоннарынан бигэргэтиэххэ наада буолар», — диэн Шагиахметов бэлиэтээтэ.

Билигин дьиэни чинчийэн көрүүнү анал тэрилтэ ыытыаҕа, оттон саахаланар туруктааҕын инженернэй чинчийиилэр уонна архитектурнай-тутуу бырайыактааһынын  национальнай  испииһэгэр киирбит эрэ исписэлиис бигэргэтиэҕэ. Саҥардыллыбыт быраабыланан ити курдук элбэх кыбартыыралаах дьиэлэри хаарбах  уонна саахаланар туруктааҕынан билинии уустугуран биэрэр. Ирдэбиллэри дойду Бэрэсидьиэнэ Владимир Путин сорудаҕынан саҥардыллыбыттара.