Арбугаевтар киинэлэрэ «Оскар» бириэмийэҕэ тиксибэтэ

Саха сирин режиссердара Максим уонна Евгения Арбугаевтар «Выход» диэн киинэлэрэ «Оскар» бириэмийэҕэ тиксибэтэ. Бу киинэ «Лучший короткометражный документальный фильм» диэн номинацияҕа күрэхтэстэ. Манна статуэтканы «Заклинателям слонов» киинэ ылары ситистэ.

Арбугаевтар киинэлэрэ биэс бастыҥ киинэ иһигэр киирдэ. Бу номинацияҕа бастыҥнары киинэ академиятын 930 чилиэнэ көрдө-иһиттэ.

«Бу саха кинематографиятыгар улахан ситиһиинэн буолар. Максим уонна Евгения Арбугаевтар саха киинэтэ үгүһү ситиһиэн сөбүн дакаастаатылар. Ис сүрэхпиттэн эҕэрдэлиибин! Айар үлэҕитигэр ситиһиилэри баҕарабын! Саха сирэ эһигинэн киэн туттар», — диэн Ил Дархан Айсен Николаев телеграмм-ханаалыгар суруйда.