Ардах халааныттан эмсэҕэлээбит 1,4 тыһ.тахса киһи төлөбүрү ылла

Өрөспүүбүлүкэ эмсэҕэлээбит оройуоннарын олохтоохторо көмө ыларга 2,4 тыһ.тахса сайабылыанньаны биэрдилэр. Уопсайа 35,51 мөл. солкуобай суумалаах төлөбүрдэр 1 431 көмө ылааччыга номнуо ыытылыннылар.

Бу туһунан СӨ Бырабыыталыстыбатын Бэрэссэдээтэлин бастакы солбуйааччыта Дмитрий Садовников иһитиннэрдэ. «Биһиги эмсэҕэлээбиттэргэ төлөбүрдэри оҥоруу түмүктэнэр түһүмэҕэр сылдьабыт. Барыта 2 491 сайабылыанньа киирдэ, онтон 1 816-та – биир кэмнээх материальнай көмөҕө, 673-тэ – үп-харчы көмөтүгэр, 2-тэ – ыксаллаах-быһыы майгы быһылаан түмүгэр доруобуйаларыгар эчэйиини ылбыт гражданнарга биир кэмнээх босуобуйаҕа. Бүгүҥҥү күҥҥэ сайабылыанньа 97%-нара көрүлүннэ», – диэн Дмитрий Садовников бэлиэтээтэ.

Кини эмсэҕэлээбит нэһилиэнньэлээх пууннарга тутуу матырыйаалларын тиэрдии тэриллибитин иһитиннэрдэ. Белай Гора бөһүөлэгэр салгын тырааныспарынан 9,8 туонна тутуу матырыйаала тиэрдилиннэ, «Полярные авиалинии» авиахампаанньа 2 салгын суудуната тардылынна. Абый улууһун кииниттэн Кэбэргэнэ сэлиэнньэтигэр матырыйааллары «ЛОРП» ПАУо уу тырааныспарынан тиэрдэр былааннанар.

Өймөкөөн улууһугар тутуу матырыйаалларын сиринэн тырааныспарынан тиэйии тэрилиннэ, барыта 8 рейс буолуоҕа. Ону таһынан, Тутуу министиэристибэтинэн алдьаммыт олорор дьиэлэри чөлүгэр түһэриигэ 200 тыһ. солк. кээмэйдээх көмө оҥоһуллуоҕа. Үбү-харчыны гражданнарга тиэрдии кэлэр нэдиэлэттэн саҕаланыа. Эмсэҕэлээбит нэһилиэнньэлээх пууннарга дьиэлэри куурдуу уонна төнүннэрэн хомуйуу, кыстыкка бэлэмнэнии үлэлэрэ ыытыллаллар.

ОДьКХ  министиэристибэтинэн оттук сезонугар бары бэлэмнэнии үлэлэрэ атырдьах ыйын 20 күнүгэр диэри түмүктэниэхтээхтэр. Онуоха диэри дьиэлэри уонна эбийиэктэри эбии куурдарга хочуолунайдары эрдэ холбуур кыах көрүллэр. «Бүгүҥҥү күҥҥэ үлэлэр өрөспүүбүлүкэ Бырабыыталыстыбатынан бигэргэтиллибит кыраапыгынан  бараллар», – диэн Дмитрий Садовников бэлиэтээтэ.