Ардах түстэ даҕаны куорат эмиэ ууга уһунна

Дьокуускайга ардах күүскэ түһэн төһө да салгын чэбдигирдэр, быыл хаптайдар, аны уулуссалар оҥхойдоро уунан туолан ууну хачайдааһын үлэтэ саҕаланна. Ол курдук «Жилкомсервис»  уонна бэдэрээтинэй тэрилтэлэр күүстэринэн уопсайа 15 ассенизатор массыына, 8 помпа, 44 ноусуоснай ыстаансыйа үлэлиир.

Куорат хаһаайыстыбатын дьаһайыыга мэры солбуйааччы Егор Кардашевскай иһитиннэрбитинэн, ууну хачайдааһын үлэтэ ордук элбэх уу мустар намыһах сирдэрдээх уулуссаларга ыытылла турар. Ууну тохтоло суох түүннэри хачайдаабыттар. Уопсайа 400 куб уу хачайдаммыт. Кардашевскай эбиэккэ диэри балаһыанньа тупсуоҕа диэн бэлиэтиир.

Маны сэргэ ууну хачайдааһын үлэтигэр салайар хампаанньалар тиэхиньикэлэрэ эмиэ кыттыһаллар. Кинилэр сыһыарыылаах дьиэлэрин тиэргэннэрин уутун хачайдыыллар.