Аркадий Семенов: «Туристарга — табыгастаах усулуобуйаны»

Ил Дархан Айсен Николаев туризм салаатын сайыннарыыга оҥоһуллубут стратегияҕа тирэҕирэн, өрөспүүбүлүкэ иһигэр араас хайысханы тобуларга санаатын эттэ.

Бу туһунан «Өлүөнэ очуостара» Айылҕа  национальнай пааркатын дириэктэрэ Аркадий Семенов санаатын маннык үллэһиннэ:

— Ил Дархан бырабыыталыстыба муниципальнай оройуоннар уонна куорат уокуруктарын дьаһалталарын кытта туризмы сайыннарыы эйгэтигэр өр кэмҥэ үөскээбит кыһалҕалары быһаарарга сорудахтаата. Бу олох сөптөөх быһаарыы. Билигин дойдуга экэниэмикэ сайдыытын төһүү салаата буоларын быһыытынан, туризмҥа улахан болҕомто ууруллар. Ураты айылҕалаах өрөспүүбүлүкэбит бу хайысхаҕа аан дойдуга бастыҥ буолар кыахтаах. Ол гынан баран, сөпкө бэлиэтэммитин курдук, бу соругу ситиһэргэ тылтан дьыалаҕа көһүөххэ наада. Туристарга мэһэйи көрсүбэккэ, дойдубут кэрэтин кэрэхсээн көрөллөрүгэр табыгастаах усулуобуйаны тэрийиэхтээхпит. Ол инниттэн гостиницалары, ыалдьыт түһэр дьиэлэрин туристическай эбиийэктэр аттыларыгар тутар сорук турар. Маны  таһынан, туризм сайдыыта айылҕа харыстабылын кытта тэҥҥэ барыахтаах диэн учуоттуур наадалаах. Бырабыыталыстыба, Ил Түмэн, муниципальнай оройуоннар уонна куорат уокуруктарын дьаһалталарын, биисинэс-уопсастыбаны уонна туроператордары кытта кыттыһан, өрөспүүбүлүкэбитигэр туризм сайдыытыгар аныгы ирдэбилгэ  усулуобуйаны тэрийиэхпитин сөп.